Біскуп Гродзенскі ўдзяліў сакрамэнт канфірмацыі ў парафіі ў Кемелішках

14 мая біскуп Гродзенскі Аляксандр Кашкевіч наведаў парафію Нараджэння Найсвяцейшай Панны Марыі ў Кемелішках (Астравецкі дэканат).

На ўрачыстай Імшы іерарх удзяліў сакрамэнт канфірмацыі маладым і дарослым парафіянам.

У Эўхарыстыі прынялі ўдзел шматлікія вернікі. Усіх прысутных прывітаў пробашч кс. Аляксандр Сямінскі, падкрэсліўшы, што гэты дзень з’яўляецца для іх сапраўдным святам, да якога яны рыхтаваліся доўгі час.

У гаміліі кс. канонік Віталій Вайцяхоўскі, рэктар Вышэйшай духоўнай семінарыі ў Гродне, засяродзіў увагу на важнасці сакрамэнту хрысціянскай сталасці ў жыцці чалавека.

На заканчэнне літургіі біскуп Аляксандр Кашкевіч заахвоціў вернікаў, асабліва моладзь, штодзённа даваць сапраўднае сведчанне пра Хрыста ў сваіх супольнасцях і мець адвагу прызнаваць, што належаць да Касцёла.

Іерарх нагадаў, што праз малітву і намашчэнне святым алеем хрызма ў сакрамэнце канфірмацыі парафіяне атрымалі дары Духа Святога, якія так неабходны кожнаму чалавеку.

Пастыр Касцёла на Гродзеншчыне пажадаў тым, хто ўзбагаціўся сямю дарамі Духа, старацца кожны дзень вызнаваць сваю веру і жыць паводле яе правілаў.

“Будзьце людзьмі веры, будзьце паслухмянымі Духу Святому, які няспынна падтрымлівае чалавека і вядзе Касцёл па дарозе жыцця”, – дадаў біскуп Аляксандр.

Прэс-служба Гродзенскай дыяцэзіі