30 сакавіка ў парафіі Святога Духа ў Гродне (Альшанка) у чарговы раз прайшоў дзень засяроджання для дзіцячых хораў.
Маленькія музыкі ўзростам ад 5 да 14 гадоў сабраліся, каб праславіць Бога, пашырыць свае вакальныя здольнасці і проста правесці час супольна.
Традыцыйна сустрэча распачалася малітвай да св. Цэцыліі – апякункі і заступніцы спевакоў. Музыка спадарожнічала дзецям на працягу ўсяго дня ў занятках, спевах і нават забавах. Дзеці разам вучыліся слухаць адзін аднаго, спалучаць свае галасы, выконваць разнастайныя музычныя заданні, дастасоўвацца да музычных інструментаў.
Кульмінацыяй сустрэчы стала сумеснае набажэнства да Маці Божай Чэнстахоўскай, на якім спевакі падзякавалі за час, праведзены разам, а таксама за вакальныя здольнасці, якімі іх узнагародзіў Бог.
Гурт “Анёлы” парафіі Святога Духа ўжо мае невялікі музычны досвед: дзеці запісалі музычны дыск з калядкамі, а ў мінулым годзе і відэакліп, паглядзець які можна па спасылцы.
Прэс-служба Гродзенскай дыяцэзіі
