Кусташ дыяцэзіяльнага санктуарыя Каралевы нашых сем’яў у Тракелях кс. канонік Юрый Бяганскі звяртаецца да кожнага верніка і пілігрыма з просьбай дасылаць сведчанні аб цудах, атрыманых праз пасрэдніцтва Маці Божай Тракельскай, для працягу напісання гісторыі цудадзейнага абраза.
Абраз Маці Божай Тракельскай славіцца шматлікімі цудамі: вядомыя факты фізічных і духоўных аздараўленняў. Кніга просьбаў і падзякаў дапаўняецца ўсё новымі запісамі людзей, якія атрымалі ў гэтым санктуарыі чаканае суцяшэнне і ласкі.
Сведчанні можна дасылаць на старонку Instagram sanktuaryimatsi, на электронную пошту bieganski@mail.ru, пошту па адрасе: 231372 Гродзенская вобл., Воранаўскі р-н, аг. Тракелі, вул. Лідская, 61А.
“На зямлі ёсць шмат месцаў, пазначаных прысутнасцю Бога, у якіх вернікі атрымліваюць шматлікія ласкі. Бог сам выбірае пэўныя месцы і ахвяруе іх чалавеку, – адзначае кс. канонік Юрый Бяганскі. – Вялікаю пашанаю акружаны месцы, дзе адбываюцца розныя цуды.
Вы прыходзіце ў Тракелі ў дыяцэзіяльны санктуарый Каралевы нашых сем’яў, прыносіце малітвы і просьбы Божага народа з розных куткоў нашай краіны і замежжа – з Літвы, Польшчы, Расіі і іншых краін, дзе вядомая цудадзейная моц абраза, – у месца, якое абрала Маці Божая, каб выслухаць сваіх дзяцей. Угледзьцеся ў твар нашай Маці, і вы прачытаеце на ім заклапочанасць лёсам кожнага, адчуеце жаданне выслухаць, дапамагчы, суцешыць. Угледзьцеся ў Яе вочы, і вы ўбачыце, з якой любоўю яны глядзяць на кожнага, колькі дабра выпраменьваюць… Давайце будзем углядацца, дзякаваць, перапрашаць, прасіць, у цішыні, у задуменні, у маўчанні, з хваляваннем. Усе мы розныя, але кожны з глыбокай верай і надзеяй, што ў гэтым маўклівым шматгалоссі будзе пачуты і менавіта мой голас, мая просьба, мой клопат…”
