8 студзеня, у свята Хросту Пана, арцыбіскуп эмерыт Тадэвуш Кандрусевіч наведаў катэдру св. Францішка Ксаверыя ў Гродне, дзе цэлебраваў Імшу для літоўскай супольнасці.
Звяртаючыся да ўдзельнікаў літургіі, іерарх падкрэсліў, што Хрост Езуса ў Ярдане стаў Яго ідэнтыфікацыяй з грэшнікамі: “будучы бязгрэшным, Ён узяў на сябе нашыя грахі, каб пасхальнай таямніцай смерці і змёртвыхпаўстання выбавіць нас з іх”.
Арцыбіскуп дадаў, што, прымаючы хрост ад Яна ў Ярдане, “Езус перамяніў габрэйскі абрад ачышчэння ў сакрамэнт хросту, які ачышчае нас з першароднага і іншых грахоў і чыніць дзецьмі Божымі, членамі Касцёла як Містычнага Цела Езуса”.
Іерарх падкрэсліў, што “хрост – гэта дар і заданне”, “мы не можам быць пасіўнымі хрысціянамі: дарам хрысціянства неабходна дзяліцца з іншымі”, “сучасны свет патрабуе хрысціянскага сведчання, як найбольш эфектыўнага інструменту евангелізацыі”.
У канцы гаміліі арцыбіскуп распавёў прыгожую гісторыю пра тое, як вадзіцель аўтамабіля спытаў пастуха, ці правільнай дарогай ён едзе. Пастух адказаў, што дарога правільная, але напрамак няправільны.
Па словах іерарха, сакрамэнт хросту “не толькі ставіць нас на правільную дарогу, але і ўказвае правільны напрамак”, “таму нам неабходна жыць яго абяцаннямі, якія з’яўляюцца компасам нашага жыцця”.
Прэс-служба Гродзенскай дыяцэзіі
