30 снежня ў дыяцэзіяльным санктуарыі Каралевы нашых сем’яў у Тракелях (Радунскі дэканат) прайшла малітоўная сустрэча пад назвай “Дайце Богу нарадзіцца ў вашых сем’ях”. У гэты дзень Касцёл адзначаў свята Святой Сям’і: Езуса, Марыі і Юзафа.
На святой Імшы, якую цэлебраваў кусташ санктуарыя кс. канонік Юрый Бяганскі, адбылося аднаўленне сужэнскіх абяцанняў. Стоячы перад Маці Божай і гледзячы адно аднаму ў вочы, сужэнцы яшчэ раз пакляліся ў вернасці і любові. Затым была адарацыя Найсвяцейшага Сакрамэнту.
“Калі адзначаем свята Святой Сям’і, нашы думкі бягуць у Назарэт. Прыкладам для нас з’яўляецца любоў, якая была ў гэтай сям’і на першым месцы, – сказаў кс. Юрый Бяганскі. – Сужэнскае жыццё трэба будаваць з Богам, а не самастойна. Трэба запрашаць Яго да сямейнага стала, сямейных размоў, з Ім трэба нахіляцца над хворым, планаваць свой час, з Ім глядзець кіно, карыстацца інтэрнэтам, з Ім прымаць гасцей, з Ім перажываць зачацце і нараджэнне дзяцей”.
Пасля благаслаўлення кусташ пажадаў: “Няхай Езус, Марыя і Юзаф благаслаўляюць і абараняюць вашы сем’і, усе сем’і ў свеце, каб у іх панавалі мір і радасць, справядлівасць і любоў і, перш за ўсё, святло, якое Хрыстус, прыходзячы ў свет, прынёс у дар усяму чалавецтву. З гэтай надзеяй давайце ўступім у новы год!”
Прэс-служба Гродзенскай дыяцэзіі
