Увечары 2 лістапада, ва ўспамін усіх памерлых вернікаў, біскуп Гродзенскі Аляксандр Кашкевіч цэлебраваў святую Імшу ў катэдральным касцёле св. Францішка Ксаверыя ў Гродне.
На Эўхарыстыі сабраліся шматлікія вернікі, якія маліліся за сваіх блізкіх спачылых і за тых спачылых, пра якіх ужо ніхто не памятае.
У гаміліі біскуп Кашкевіч падкрэсліў, што найважнейшай сутнасцю гэтага дня з’яўляецца не смерць, а надзея, што нават смерць не азначае канца ўсяго.
Біскуп дадаў, што гэтая надзея была дадзена нам з уваскрасеннем Езуса.
Пастыр Касцёла на Гродзеншчыне адзначыў, што кожны чалавек быў створаны для жыцця вечнага, для радасці прабывання разам з Богам. “Каб знайсці гэтую радасць, чалавек мусіць дасягнуць святасці, значыць пазбавіцца ўсяго, што аддаляе яго ад Бога, і выправіць зло, якое дапусціў”, – сказаў біскуп.
Па словах іерарха, Пан у сваім Провідзе дае нам шмат нагодаў, каб узрастаць у святасці, у веры і любові да Яго, развіваць нашы цноты і таленты, а таксама рабіць дабро бліжнім.
Біскуп нагадаў вернікам, што найвялікшы дар, які можна ахвяраваць чыстцовым душам, – гэта наша малітва.
“Замоўленая святая Імша, Ружанец, наведванне могілак, прамаўленне хаця б адной малітвы будуць для іх найбольшым выразам нашай памяці і любові, бо дапамогуць навекі з’яднацца з міласэрным Богам”, – дадаў іерарх.
Усім прысутным у святыні біскуп Гродзенскі пажадаў, каб сустрэча з Богам, калі настане гэтая хвіліна, была сустрэчай радаснай.
Прэс-служба Гродзенскай дыяцэзіі
Фота: Яўген Занеўскі