22 кастрычніка ў санктуарыі Гродзенскай дыяцэзіі Маці Божай Каралевы нашых сем’яў у Тракелях (Радунскі дэканат) адбылася малітва ў інтэнцыі супакою.
Шматлікія пілігрымы і мясцовыя парафіяне падчас адарацыі Найсвяцейшага Сакрамэнту прасілі асабістага супакою, супакою ў сем’ях і ва ўсім свеце.
Малітву ўзначаліла сястра Кацярына Бучынская, кусташ санктуарыя кс. канонік Юрый Бяганскі цэлебраваў святую Імшу ў інтэнцыі супакою.
На Эўхарыстыі вернікі прасілі Бога, які даў нам запаведзь любові як галоўны прынцып жыцця, каб усе людзі на зямлі сталі руплівымі будаўнікамі салідарнага свету, у якім любоў ператварае ўзброеныя канфлікты ў супакой, а цывілізацыю смерці – у цывілізацыю жыцця.
Прэс-служба Гродзенскай дыяцэзіі
