4 кастрычніка, у літургічны ўспамін св. Францішка Асізскага, біскуп Гродзенскі Аляксандр Кашкевіч наведаў парафіяльную супольнасць Маці Божай Анёльскай у Гродне, дзе служаць айцы францішкане.
У касцёле, куды 100 гадоў таму прыбыў на служэнне св. Максімільян Марыя Кольбэ, іерарх цэлебраваў урачыстую Імшу.
На Эўхарыстыі група моладзі прыняла сакрамэнт хрысціянскай сталасці.
Усіх прысутных прывітаў пробашч парафіі а. Сяргей Мігун OFM Conv. Святар адзначыў, што літургічны ўспамін бедняка з Асізі для францішканскай сям’і з’яўляецца вялікім днём, калі яго духоўныя сыны і дочкі ўглядаюцца ва ўзор яго жыцця і хочуць зноў запаліць у сабе агонь Божай любові.
У гаміліі прэс-сакратар Гродзенскай курыі кс. канонік Юрый Марціновіч засяродзіў увагу на тым, што св. Францішак, нягледзячы на адмаўленне ад матэрыяльных дабротаў і маёмасці свайго бацькі, быў заўсёды багаты Богам, дзелячыся з іншымі мірам і дабром.
На заканчэнне Эўхарыстыі маладыя людзі, якія прыступілі да сакрамэнту канфірмацыі, падзякавалі ўсім тым, хто рыхтаваў іх да гэтай падзеі. Асаблівую падзяку яны выказалі сястры Валерыі за катэхізацыю, а таксама сваім душпастырам за клопат і духоўную апеку.
У сваю чаргу біскуп Аляксандр Кашкевіч папрасіў моладзь быць па прыкладзе святога бедняка з Асізі яскравым знакам для свету, як любіць Бога і паважаць іншага чалавека.
Прэс-служба Гродзенскай дыяцэзіі
Фота: Баляслаў Гавецкі
