На адкрытай пляцоўцы Іўеўскага цэнтра культуры і вольнага часу адбылося ўрачыстае мерапрыемства, прысвечанае Дню пажарнай службы. Між іншым супрацоўнікаў райаддзела Міністэрства па надзвычайных сітуацыях павіншаваў пробашч парафіі святых апосталаў Пятра і Паўла ў Іўі кс. Павел Калеснік.
Пра гэта паведамляе газета “Іўеўскі край”.
Раздзяліць святочны настрой прыйшлі родныя і блізкія работнікаў аддзела, ветэраны пажарнай службы, старшыня Іўеўскага раённага выканаўчага камітэта Ігар Генец, прадстаўнікі розных арганізацый раёна.
Ксёндз Павел Калеснік пажадаў выратавальнікам менш надзвычайных сітуацый, а таксама моцнага здароўя і сілы духу. Затым ён акрапіў іх святой вадой.
Калектыў Іўеўскага РАНС не першы раз запрашае святара на сваё прафесійнае свята.
Штогод пажарнікі ўдзельнічаюць у супольнай малітве ва ўспамін свайго апекуна святога Фларыяна. Таксама яны заўсёды адгукаюцца на просьбу аб дапамозе ў добраўпарадкаванні касцёла і арганізацыі розных мерапрыемстваў.
