Парафіяльны адпуст у гонар Сэрца Езуса адзначылі з удзелам біскупа Гродзенскага ў Солах

24 чэрвеня біскуп Гродзенскі Аляксандр Кашкевіч наведаўва парафіяльную супольнасць Маці Божай Ружанцой у Солах (Смаргонскі дэканат). У гэты дзень парафія адзначала адпустовую ўрачыстасць Найсвяцейшага Сэрца Езуса.

На Эўхарыстыі сабраліся шматлікія парафіяне і госці парафіі, прыбылі таксама святары.

Біскуп цэлебраваў Імшу ў інтэнцыі маладых людзей, якія ў гэты дзень у Солах прынялі сакрамэнт хрысціянскай сталасці, і ўсіх, хто ўтварае гэтую парафію, на чале з яе пробашчам кс. канонікам Леанардам Станкоўскім.

У гаміліі кс. канонік Юрый Марціновіч, прэс-сакратар Гродзенскай дыяцэзіі, казаў пра тое, як важна ўглядацца ў Найсвяцейшае Сэрца Пана Езуса, якое адкрыта на кожнага чалавека. Святар падкрэсліў, што з адкрытасці Бога кожны можа ўзяць адпаведную колькасць Яго любові, дабрыні, міласэрнасці, каб адорваць іншых людзей.

На заканчэнне Імшы біскуп, звяртаючыся да тых, хто ўзбагаціўся сямю дарамі Духа Святога ў сакрамэнце хрысціянскай сталасці, заахвоціў іх быць адкрытымі на дзеянне Духа, каб штодзённа рэалізоўваць сваё жыццёвае пакліканне.

Пастыр Касцёла на Гродзеншчыне пажадаў моладзі быць блізка да Хрыста на шляху Евангелля, Божых загадаў, любові і прабачэння, служэння Богу і бліжняму.

Пробашч парафіі падзякаваў усім сваім вернікам і гасцям за прыбыццё на супольную малітву, а маладыя людзі, умацаваныя сакрамэнтам канфірмацыі, выказалі словы ўдзячнасці біскупу і тым, хто рыхтаваў іх да гэтай важнай у іх жыцці падзеі.

Прэс-служба Гродзенскай дыяцэзіі