З 20 па 22 чэрвеня міністранты парафій у Макараўцах, Індуры і Вялікай Бераставіцы наведалі гістарычныя месцы нашай краіны.
12 юнакоў з розных парафій Бераставіцкага дэканату пад кіраўніцтвам кс. Паўла Беланоса раніцай 20 чэрвеня адправіліся ў невялікае трохдзённае падарожжа па гістарычна важных месцах Беларусі.
Першым пунктам стаў санктуарый у Росі. Каля цудадзейнай фігуры Езуса Журботнага адбылася святая Імша для ўдзельнікаў падарожжа, на якой кс. Павел у гаміліі растлумачыў юнакам значэнне гэтай фігуры.
Пасля Імшы хлопцаў чакаў смачны пачастунак. Пазней міністранты накіраваліся ва Уселюб, дзе адбыўся начлег. Ва Уселюбе міністранты мелі таксама магчымасць адпачыць на свежым паветры, пазабаўляцца і падсілкавацца грылем. У канцы першага дня падарожнікі ўдзельнічалі ў адарацыі Найсвяцейшага Сакрамэнту, якую правёў пробашч уселюбскай парафіі кс. Віталій Цыбульскі.
Другі дзень юнакі распачалі малітвай і Эўхарыстыяй. Насыціўшыся духоўнай і фізічнай ежай, міністранты накіраваліся ў далейшы шлях. На гэты раз у праграме было наведванне Нясвіжскага і Мірскага замкаў. Вярнуўшыся на начлег ва Уселюб, юнакі наладзілі забавы, гульні і вогнішча.
Чарговым пунктам падарожжа ў трэці дзень быў Навагрудак, першая сталіца ВКЛ. Юнакі пазнаёміліся з гісторыяй горада, постаццю знакамітага пісьменніка Адама Міцкевіча, наведалі касцёлы, а таксама памаліліся на месцы расстрэлу благаслаўлёных сясцёр назарэтанак. На гэтым падарожжа завяршылася.
Aндрэй Юхнік
