7 мая ў базыліцы св. Міхала Арханёла і св. Станіслава ў Кракаве (Польшча) прынялі пасвячэнне ў ступені дыяканату дзевяць паўлінаў-семінарыстаў. Сярод іх быў брат Сяргей Калюта, які паходзіць з Гродзенскай дыяцэзіі – з ваўкавыскай парафіі св. Вацлава.
Святую Імшу ўзначаліў дапаможны біскуп Каліскай дыяцэзіі Лукаш Бузун, які таксама належыць да Ордэну паўлінаў.
Дыякан Сяргей Калюта нарадзіўся ў 1997 г. у Ваўкавыску. Там жа ў касцёле св. Вацлава ў 2008 г. прыняў Першую святую Камунію.
Фармацыю да святарства пачаў у 2015 г. у Вышэйшай духоўнай семінарыі ў Гродне.
У 2016 г. быў прыняты ў Ордэн паўлінаў. На заканчэнне навіцыяту 8 верасня 2017 г. прынёс першыя часовыя манаскія абяцанні. Вучыцца ў Вышэйшай духоўнай семінарыі айцоў паўлінаў у Кракаве.
25 сакавіка гэтага года, ва ўрачыстасць Звеставання Пана, на Яснай Гары ў Чэнстахове (Польшча) прынёс вечныя манаскія абяцанні на выключнае Божае служэнне ў Ордэне святога Паўла, Першага пустэльніка.
Прэс-служба Гродзенскай дыяцэзіі
