1 мая ў санктуарыі Гродзенскай дыяцэзіі Маці Божай Каралевы нашых сем’яў у Тракелях (Радунскі дэканат) адбыліся галоўныя святкаванні Дыяцэзіяльнага дня маці.
У гэты дзень шмат вернiкаў з розных куткоў дыяцэзіі прыбылі ў тракельскую святыню, каб памаліцца за самага блізкага чалавека – сваю маму. Некаторыя прыйшлі пешкі з Ліды, а таксама з іншых месцаў.
Пачаліся ўрачыстасці з адарацыі Найсвяцейшага Сакрамэнту, падчас якой удзельнікі дзякавалі Богу за сваіх матуль, якія перадалі жыццё і веру.
Кульмінацыяй святкаванняў была Імша, якую цэлебраваў біскуп Гродзенскі Аляксандр Кашкевіч у інтэнцыі ўсіх маці дыяцэзіі: як жывых, так і тых, хто ўжо адышоў у вечнасць.
Іерарх асабліва заахвоціў да малітвы за маці, якія яшчэ толькі носяць пад сэрцам новае жыццё, каб яны цанілі яго як найбольшы Божы дар.
У гаміліі біскуп адзначыў, што найчысцейшая і самая бескарыслівая любоў – гэта любоў маці. “Матчына любоў – адзін з самых цудоўных дароў, які Бог даў чалавеку. Калі хто і не мае зямной маці, ён не сірата, бо ў нас ёсць Марыя – наша нябесная Матуля”, – дадаў іерарх.
Пастыр Касцёла на Гродзеншчыне падкрэсліў, што маці – першы чалавек, якога мы сустракаем на дарозе нашага жыцця, які з самага пачатку поўны клопату аб нашым існаванні, нашай будучыні.
“Яна – поўная непакою і страху, цеплыні і сардэчных пачуццяў, адданая без рэшты свайму вялікаму скарбу, дорачы яму сваю любоў, час, сілы і сэрца”, – дадаў біскуп.
Іерарх адзначыў, што “маці першая нас прыняла адкрытым сэрцам і поўнасцю, і яна найлепш здольная захіліць ад дзіцяці негатыўныя бакі жыцця: боль, недахоп, нязручнасці. Замест гэтага яна адкрывае яму тое, што ў жыцці найпрыгажэйшае”.
Усіх сабраных вакол палявога алтара біскуп заклікаў дзякаваць Пану Богу за сваіх зямных маці, выказваць ім удзячнасць і любоў, маліцца за іх.
Звяртаючыся да ўсіх прысутных маці, іерарх падзякаваў ім за сэрцы, поўныя любові і дабрыні, за клапатлівыя, любячыя вочы, спрацаваныя рукі, бязмежную любоў.
Спевам літургію аздобіў хор “Ружы Марыі” парафіі Маці Божай Ружанцовай у Радуні.
Пасля Імшы ўдзельнікі ўрачыстасцяў прайшлі Крыжовы шлях, разам з кусташам санктуарыя кс. Юрыем Бяганскім разважаючы аб ролі мацярынства ў сучасным свеце.
На заканчэнне святкаванняў кусташ aдзначыў: “Наша Панна Тракельская хоча, каб у вашых сэрцах, у сем’ях заўсёды панаваў супакой. Давайце будзем шанаваць кожнага чалавека, як сваю маці. Калі мы хочам жыць у супакоі і радасці, то павінны вучыцца гэтаму ад Марыі ў прыняцці Хрыста”.
Таксама святар заахвоціў усіх да ўдзелу ў адпустовых дыяцэзіяльных урачыстасцях, якія пройдуць у тракельскім санктуарыі 9-10 ліпеня.
Прэс-служба Гродзенскай дыяцэзіі