У Смаргоні ўпершыню адбылася дэканальная сустрэча з удзелам Ардынарыя Гродзенскай дыяцэзіі ксяндза біскупа Аляксандра Кашкевіча. На сустрэчу 22 лістапада ксёндз біскуп прыбыў па запрашэнні ксяндза дэкана Здзіслава Вэдэра SDB. Спатканне распачалося ўрачыстай св. Імшой, якую цэлебраваў ксёндз біскуп А. Кашкевіч. Казанне пра ролю святара ў сучасным свеце, у рэлігійным выхаванні ў сям’і прамовіў прафесар Гродзенскай вышэйшай духоўнай семінарыі ксёндз канонік Раман Катлімоўскі. Пасля св. Імшы святары дэканату сустрэліся на сумесным спатканні ў моладзевым цэнтры, якое распачалося канферэнцыяй пра стан дэканату і бягучыя справы. Таксама святары мелі магчымасць выказаць ксяндзу біскупу А. Кашкевічу свае дасягненні, радасці і клопаты ў парафіяльнай працы, падзяліцца сваімі думкамі і меркаваннямі, задаць ксянзу біскупу пытанні. Падсумоўваючы, ксёндз біскуп заахвоціў святароў да вернасці свайму пакліканню і даручаным пастырскім абавязкам, да клопату аб навучанні дзяцей, моладзі і старэйшых. Ён нагадаў не забываць пра сваю святарскую ідэнтычнасць Божага слугі і імкнуцца ўдасканальваць сваё пастырскае служэнне. Словамі падзякі за руплівую працу, пажаданнем далейшага Божага благаслаўлення ксёндз біскуп А. Кашкевіч завяршыў дэканальнае спатканне.
