Зрабі жыццё служэннем: велікапосны дзень засяроджання для святароў адбыўся ў Ашмянах

22 сакавіка ў парафіі св. Міхала Арханёла ў Ашмянах прайшоў дзень засяроджання для святароў, якія служаць на тэрыторыі Гродзенскай дыяцэзіі. У сустрэчы ўдзельнічалі найперш святары з Ашмянскага, Астравецкага, Смаргонскага і Іўеўскага дэканатаў.

Удзел у сустрэчы прынялі каля 40 святароў – дыяцэзіяльных і з манаскіх супольнасцяў – на чале з біскупам Гродзенскім Аляксандрам Кашкевічам.

Прысутныя ўдзельнічалі ў набажэнстве Крыжовага шляху. На кожнай стацыі той, хто праводзіў разважанні, заахвоціў святароў зрабіць рахунак сумлення, каб яшчэ больш распаліць у сабе агонь Божай любові і з большай адданасцю служыць Богу і людзям, да якіх яны былі пасланы.

Таксама яны выслухалі канферэнцыю, з якой выступіў духоўны айцец святароў Гродзенскай дыяцэзіі а. доктар Андрэй Шчупал CSsR. Ён звярнуў увагу на пагрозы, якія перашкаджаюць духавенству эфектыўна выконваць сваю місію ў Касцёле.

Рэдэмптарыст заахвоціў святароў да штодзённай малітвы, адарацыі Найсвяцейшага Сакрамэнту, Ружанца, рахунку сумлення, споведзі, дысцыпліны і пастаяннай працы над сваім характарам, падкрэсліўшы, што гэта толькі некаторыя сродкі для падтрымкі духоўнага жыцця.

Цэнтральнай падзеяй дня была святая Імша, якую цэлебраваў пастыр дыяцэзіі. Біскуп Аляксандр заахвоціў духавенства маліцца ў інтэнцыі міру, які сёння патрэбны ўсёй Еўропе, а асабліва Украіне.

У гаміліі кс. Павел Раманоўскi, пробашч парафіі святых апосталаў Пятра і Паўла ў Граўжышках (Ашмянскі дэканат), адзначыў, што перыяд Вялікага посту – асаблівая нагода, каб, углядаючыся ў Муку Хрыста, адкрыць для сябе сапраўднае аблічча Бога, які прабачае, убачыць свае грахі, якія з’яўляюцца прычынай мукі Сына Божага, прызнаць, што нам патрэбна прабачэнне, і дазволіць скрушыць сваё сэрца, каб пачаць па-іншаму ставіцца да людзей, якія знаходзяцца вакол кожнага святара.

Ксёндз Раманоўскі падкрэсліў, што Езус Хрыстус патрабуе ад сваіх вучняў “вялікага сэрца”, “хоча, каб мы Яго наследавалі ў Яго боскім прабачэнні”, “жадае, каб намі кіраваў Яго супакой і праз нас выпраменьваўся на іншых”.

На заканчэнне Эўхарыстыі біскуп Гродзенскі падзякаваў усім прысутным за прыбыццё і ўдзел у дні засяроджання, падкрэсліўшы неабходнасць такіх сустрэч, якія пазітыўна ўплываюць на будаўніцтва святарскага адзінства і з’яўляюцца добрай нагодай аднавіць сваё духоўнае жыццё.

Іерарх заклікаў кожнага святара зрабіць сваё жыццё служэннем іншаму чалавеку і заўсёды мець час для сваіх парафіян, каб іх выслухаць, маліцца за іх і прыйсці да іх з канкрэтнай дапамогай.

Кс. Юрый Марціновіч