На Божае Нараджэнне біскуп Кашкевіч асвяціў новы касцёл у Гродне

25 снежня, ва ўрачыстасць Божага Нараджэння, біскуп Гродзенскі Аляксандр Кашкевіч асвяціў касцёл Найсвяцейшай Панны Марыі Вастрабрамскай Маці Міласэрнасці ў Гродне (Аўгустовак).

Новая святыня ў стылі неабарока паўстала на тэрыторыі былога маёнтку Аўгустовак, які належаў апошняму каралю Рэчы Паспалітай Станіславу Аўгусту Панятоўскаму.

Парафія, якая мае тытул галоўнай Апякункі Гродзенскай дыяцэзіі, была зарэгістравана дзяржаўнымі ўладамі 10 студзеня 1998 г.

На Імшы сабраліся шматлікія парафіяне разам са сваім пробашчам кс. Аляксандрам Шэметам, які на пачатку літургіі прывітаў усіх гасцей і ахвярадаўцаў.

На Эўхарыстыі асаблівым чынам дзякавалі Пану Богу за дар гэтага касцёла, а таксама маліліся за ўсіх людзей добрай волі, якія прычыніліся да яго ўзвядзення.

У гаміліі генеральны вікарый Гродзенскай дыяцэзіі кс. канонік Аляксандр Мацкевіч нагадаў гісторыю парафіі і будаўніцтва святыні, якая не была лёгкай.

Святар падкрэсліў, што дзякуючы вялікай малітве пробашча са сваімі парафіянамі ўдалося завяршыць будаўніцтва касцёла, які так патрэбны вернікам.

На заканчэнне Імшы пробашч выказаў удзячнасць усім, хто падтрымліваў будаўніцтва на розных этапах і ўдзельнічаў у ім.

У сваю чаргу біскуп Аляксандр Кашкевіч адзначыў, што новы касцёл яшчэ больш упрыгожыць горад над Нёманам, а таксама стане для парафіян асаблівым месцам сустрэчы з Богам.

Іерарх падзякаваў вернікам таксама за ўтварэнне жывога Касцёла, якім з’яўляюцца яны самі, бо без іх, дадаў ён, святыня была б пустой.

Пастыр Касцёла на Гродзеншчыне выказаў падзяку пробашчу кс. Аляксандру Шэмету і вернікам за іх старанні і самаадданасць, дзякуючы чаму ў гэты ўрачысты дзень Божага Нараджэння чарговая каталіцкая святыня адчыніла свае дзверы.

Біскуп пажадаў, каб Хрыстус, народжаны з Панны Марыі, быў у сэрцы кожнага чалавека, не толькі ў святы, але і кожны дзень, даючы свае дары і тое, што кожнаму патрэбна для душы і цела.

Кс. Юрый Марціновіч

Фота: Баляслаў Гавецкі