“Святло надзеі”: у Гродна прыбыў Бэтлеемскі агонь

16 снежня ў гродзенскі катэдральны касцёл св. Францішка Ксаверыя быў унесены Бэтлеемскі агонь міру, які даставілі харцэры з польска-беларускай мяжы, з памежнага пераходу ў Вялікай Бераставіцы. Менавіта з горада над Нёманам пачалася штогадовая эстафета перадачы агню па гарадах і мястэчках Беларусі.

Урачыста прывітаў гэты незвычайны знак біскуп Гродзенскі Аляксандр Кашкевіч. Іерарх адзначыў, што сёлетняя акцыя дзялення агнём, які да нас прыходзіць з пячоры ў базыліцы Нараджэння ў Бэтлееме, адбываецца пад дэвізам “Святло надзеі”.

Пастыр Касцёла на Гродзеншчыне дадаў, што гэтае маленькае полымя “пабуджае нас да веры, да моцы, да любові і да нясення міру”.

Іерарх выказаў надзею, што гэтае святло стане матывацыяй і сілай усіх вернікаў для пераадольвання цяжкасцяў, іскрай, якая загарыцца ў сэрцы кожнага і дапаможа сустракаць сучасныя выклікі.

“Няхай гэтае святло стане знакам для ўсіх, што мы адна сям’я дзяцей Божых, няхай дае надзею на лепшае заўтра, на любоў у кожнай сям’і і на жаданы мір ва ўсім свеце”, – сказаў біскуп.

Іерарх падзякаваў усім, хто ўдзельнічае ў перадачы гэтага сімвалу Божага Нараджэння. Словы ўдзячнасці ён выказаў харцэрам, якія прынеслі агонь у Гродна як знак Езуса Хрыста, які прыходзіць да нас у таямніцы свайго Нараджэння. Менавіта дзякуючы іх удзелу перадача Бэтлеемскага агню стала пастаянным элементам калядных традыцый у горадзе над Нёманам.

Іерарх падзякаваў таксама скаўтам, якія занясуць Бэтлеемскі агонь у іншыя парафіяльныя супольнасці Беларусі.

“Нясіце гэтае святло, але адначасова самі будзьце святлом. Няхай іншыя, бачачы вашы паводзіны, бачаць радасць ад прабывання з Езусам, жыццё сапраўды хрысціянскае, якое асвятляе ўсю гэтую жыццёвую цемру”, – дадаў біскуп, звяртаючыся да тых, хто панясе Бэтлеемскі агонь у розныя месцы нашай краіны.

Карыстаючыся нагодай, біскуп Кашкевіч ужо цяпер выказаў святочныя віншаванні ўсім прысутным у катэдры, пажадаўшы вясёлых святаў, што былі б сапраўднай сустрэчай з Езусам Хрыстом, які прыносіць радасць і надзею.

Акцыя перадачы Бэтлеемскага агню міру бярэ пачатак у Аўстрыі ў 1986 г. Агонь перадаецца з рук у рукі з Бэтлеема. У пячоры Нараджэння Пана гарыць вечны агонь, ад якога штогод запальваецца лампада, полымя якой, што нясуць скаўты праз краіны і кантыненты, абыходзіць свет.

Святло з Бэтлеема нагадвае людзям пра адзінства і братэрства, а таксама пра Любоў. Бо менавіта з любові да чалавека больш за дзве тысячы гадоў таму ў Палестыне нарадзіўся Збаўца.

Кс. Юрый Марціновіч

Фота: Вольга Сяліцкая