30 лістапада, у свята св. Андрэя, апостала, у санктуарыі Гродзенскай дыяцэзіі Маці Божай Каралевы нашых сем’яў у Тракелях (Радунскі дэканат) прайшла фармацыйная сустрэча для духавенства Гродзенскай дыяцэзіі да 5 гадоў святарства.
У сустрэчы, якая адбылася пасля перапынку, удзельнічалі восем святароў.
Імшу ў дыяцэзіяльным санктуарыі ўзначаліў біскуп Гродзенскі Аляксандр Кашкевіч. На пачатку Эўхарыстыі іерарх падкрэсліў, што трэба нястомна дзякаваць Богу за дар паклікання, якім Пан адарыў кожнага святара.
У гаміліі кс. канонік Павел Салабуда, які нядаўна быў прызначаны мадэратарам пастаяннай фармацыі маладых святароў Гродзенскай дыяцэзіі і ў першы раз арганізаваў такую сустрэчу, адзначыў, што варта выкарыстаць час Адвэнту для асабістага дыялогу з Богам.
Ксёндз Павел Салабуда дадаў, што падчас штодзённага выканання сваіх душпастырскіх абавязкаў варта на адвэнтавым шляху спыніцца на хвіліну і зірнуць на сваё жыццё, а таксама пастаянна дзякаваць Богу за тое, што з’яўляешся святаром, пасланым, каб несці людзям радасць Евангелля.
З канферэнцыяй на тэму “Сацыяльныя медыя ў душпастырстве” выступіў пробашч парафіі св. Міхала Арханёла ў Навагрудку кс. доктар Юрый Жэгарын. Святар звярнуў увагу на тое, што інтэрнэт у большасці спраўджваецца толькі як інструмент першаснага кантакту, які павінен прыводзіць да сапраўднай міжперсанальнай камунікацыі, а таксама ў якасці перадачы сацыяльна значнай інфармацыі, напрыклад арганізацыйных справаў.
Святар адзначыў, што ёсць дзвe асноўныя мэты карыстання сацыяльнымі медыя: актывізацыя ўласнай парафіяльнай супольнасці і пошук новых людзей, a рэалізацыя гэтага – вельмі працаёмкі працэс, які патрабуе некаторых здольнасцяў.
Па словах кс. Юрыя Жэгарына, сацыяльныя сеткі можна трактаваць вельмі інструментальна, як прыладу, якая можа адрасна, у рэальнай камунікацыі, дапамагчы чалавеку. Святар дадаў, што той, хто ажыццяўляе перадачу і мае намер прывесці чалавека да рэальнай камунікацыі, сам павінен быць дастаткова сацыялізаваным і камунікатыўным.
Прэс-служба Гродзенскай дыяцэзіі
