28 лістапада, у першую нядзелю Адвэнту, арцыбіскуп на пенсіі Тадэвуш Кандрусевіч благаславіў адноўленую гістарычную амбону ў касцёле Адшукання Святога Крыжа ў Гродне (пабернардынскім).
Іерарх па запрашэнні пробашча парафіі ксяндза прэлата Антонія Ханькі ўзначаліў цэлебрацыю святой Імшы разам з біскупам Гродзенскім Аляксандрам Кашкевічам.
У гаміліі, якую арцыбіскуп прамовіў з адноўленай амбоны, ён падкрэсліў, што галоўным заданнем Адвэнту з’яўляецца не знешняя падрыхтоўка да святаў Божага Нараджэння, а распазнанне стану нашага духоўнага жыцця, выяўленне яго хваробаў і спосабаў лячэння, каб гэтыя хваробы не сталі хранічнымі і смяротнымі. Толькі тады Адвэнт будзе мець сэнс і Езус народзіцца ў нашых сэрцах сваёй ласкай, дадаў іерарх.
“Святы апостал Павел вучыць, што вера ад слухання. З амбоны гучыць Божае слова, якое неабходна слухаць больш, чым людзей, каб паспяхова вырашаць праблемы і не страціць надзеі на лепшую будучыню”, – сказаў арцыбіскуп.
Таксама іерарх нагадаў прысутным, што 60 гадоў таму ў ноч з 28 на 29 лістапада быў узарваны найстарэйшы гродзенскі касцёл – Фара Вітаўта. Гэта, як адзначыў ён, вынік выхавання без Бога, калі ўсё дазволена, у тым ліку руйнаванне помнікаў сакральнай архітэктуры.
Адноўленая амбона, па словах арцыбіскупа, будзе нагадваць людзям аб вечна жывым і актуальным Божым слове з мэтай умацавання веры і хрысціянскага сведчання, “каб Беларусь стала Бэтлеемам ХХІ стагоддзя, святло якога асветліць духоўную цемру нашага часу, надасць нашаму жыццю вызначаны Богам напрамак і прынясе так доўга чаканы супакой”.
На заканчэнне Імшы пробашч парафіі падзякаваў іерархам за супольную малітву на парозе новага літургічнага года і выказаў надзею, што пастырскае благаслаўленне, якое яны ўдзялілі вернікам, дапаможа добра і плённа перажыць час Адвэнту.
Прэс-служба Гродзенскай дыяцэзіі