>Заключнай урачыстасцю, прысвечанай 70-годдзю са дня пакутніцкай смерці св. Максіміліяна Кольбэ, стала св. Імша ў базіліцы 30 кастрычніка з удзелам Мітрапаліта Мінска-Магілёўскага Тадэвуша Кандрусевіча і Біскупа Гродзенскага Аляксандра Кашкевіча.
“Можна сказаць, што Гродна і гэтыя землі з’яўляюцца месцам святых і бласлаўлёных, якія аддавалі сваё жыццё за святы Касцёл, за бліжняга, у абароне веры і крыжа як знака нашага Збаўлення. Св. Максіміліян таксама з’яўляецца Заступнікам нашай дыяцэзіі, і мы верым, што ён заступаецца за нас перад абліччам Бога. Падчас кананізацыі 10 кастрычніка 1982 г. бл. Ян Павел II сказаў: “Айцец Максіміліян Кольбэ пацвердзіў сваім пакутніцтвам права Бога на жыццё нявіннага чалавека, даў сведчанне Хрысту і любові”, – адзначыў на пачатку св. Імшы кс. бп Аляксандр Кашкевіч. На падзячнай св. Імшы прысутнічалі шматлікія госці: айцы францішкане з Рыму, Варшавы, Узбекістана, Балгарыі, айцец Грыгорый як прадстаўнік ад праваслаўнай Царквы, духавенства і прадстаўнікі манаскіх супольнасцей Гродзенскай дыяцэзіі, прадстаўнік улады – кіраўнік абласнога аддзела па справах рэлігіі і нацыянальнасцей Ігар Папоў, Генеральны консул Польшчы ў Гродне Анджэй Хадкевіч.
На ўрачыстай св. Імшы ксёндз арцыбіскуп Тадэвуш Кандрусевіч прамовіў гамілію, у якой сярод іншага сказаў: “Узгадваючы жыццё і дзейнасць св. Максіміліяна Кольбэ, мы павінны спытаць сябе: а як жа з нашым сённяшнім жыццём?”
Напрыканцы св. Імшы а. д-р.н. Міраслаў Бартос, правінцыял з супольнасці айцоў францішканаў у Варшаве, ад імя супольнасці падзякаваў прысутным за арганізацыю і ўдзел ва ўрачыстасцях з нагоды 70-годдзя са дня смерці св. Максіміліяна Кольбэ.
