Вернікі Гродзенскай дыяцэзіі праз Caritas перадалі дапамогу мігрантам на мяжы

23 лістапада прадстаўнікі Рэлігійнай місіі “Дабрачыннае каталіцкае таварыства “Карытас”” на чале з дырэктарам кс. доктарам Раманам Рачко сумесна з прадстаўнікамі іншых канфесій перадалі дапамогу людзям, якія сталі ахвярамі міграцыйнага крызісу і апынуліся ў нялюдскіх умовах на беларуска-польскай мяжы.

Гэта ўжо другая партыя гуманітарнай дапамогі, перададзеная дабрачыннай арганізацыяй мігрантам, якія зараз знаходзяцца ў транспартна-лагістычным цэнтры, што стаў часовым прытулкам для людзей з краін Блізкага Усходу, сярод якіх нямала жанчын і дзяцей. Дапамога будзе размеркаванa сярод патрабуючых.

Акрамя гэтай дапамогі, якую аказваюць вернікі Гродзенскай дыяцэзіі, у святынях узносяцца малітвы ў інтэнцыі мігрантаў, а таксама ўсіх тых, ад каго залежыць вырашэнне гэтай сітуацыі, каб яна была вырашана як найхутчэй мірным шляхам, з павагай да годнасці кожнага чалавека.

Прэс-служба Гродзенскай дыяцэзіі