У нядзелю 14 лістапада ў каталіцкіх парафіях Гродзенскай дыяцэзіі пачаўся збор сродкаў для дапамогі мігрантам, якія знаходзяцца на беларуска-польскай мяжы.
У сувязі з гэтай сітуацыяй біскуп Гродзенскі Аляксандр Кашкевіч выдаў паведамленне, адрасаванае ўсім святарам, якія служаць на тэрыторыі дыяцэзіі, каб заахвоціць вернікаў далучыцца да дапамогі людзям, якія апынуліся ў цяжкім становішчы.
“Як хрысціяне мы не можам заставацца абыякавымі да драмы чалавечага цярпення. Будзем памятаць словы Пана Езуса: “Бо Я быў галодны, і вы далі Мне есці; прагнуў, і вы напаілі Мяне […]. Тое, што вы зрабілі аднаму з гэтых братоў Маіх меншых, вы Мне зрабілі” (Mц 25, 35.40).
Наш маральны абавязак – уключыцца ў справу дапамогі мігрантам, якія знаходзяцца на тэрыторыі нашай Гродзенскай дыяцэзіі”, – адзначаецца ў паведамленні.
Адначасова ў гродзенскіх парафіях арганізаваны збор цёплага адзення, абутку, сродкаў асабістай гігіены, коўдраў, прадуктаў харчавання. Сабраныя рэчы і прадукты будуць забраны з парафій супрацоўнікамі дабрачыннага каталіцкага таварыства “Caritas” Гродзенскай дыяцэзіі і перададзены патрабуючым.
Усе зацікаўленыя могуць пераслаць свае ахвяраванні таксама на рахунак Рэлігійнай місіі “Дабрачыннае каталіцкае таварыства Карытас” Гродзенскай дыяцэзіі:
УНП 500160938
ОКПО 2886022
дабрачынны рахунак у беларускіх рублях
BY06 PJCB 3135 6031 8900 2000 0933
ААТ «Приорбанк» ЦБУ 600 г. Гродна
Код PJCBBY2X
Біскуп Гродзенскі выказвае ўдзячнасць усім вернікам за спаўненне евангельскага абавязку дапамогі патрабуючым і за асабістае ўключэнне ў арганізаваную дабрачынную акцыю.
Прэс-служба Гродзенскай дыяцэзіі
