19 кастрычніка ў касцёле св. апостала Андрэя ў Слоніме адбылося развітанне са спачылай сястрой Станіславай Ушакевіч з Трэцяга рэгулярнага ордэну св. Францішка Асізскага (бернардынкі).
Сястра Станіслава нарадзілася ў Дэвергах на Іўеўшчыне, паходзіла з парафіі Перамянення Пана ў Юрацішках (Іўеўскі дэканат). Адышла ў вечнасць ва ўзросце 88 гадоў.
У старадаўняй святыні на малітве сабраліся сёстры з супольнасці памерлай законніцы, браты капуцыны і вернікі парафіі, каб падзякаваць Пану за дар яе жыцця і папрасіць Божай міласэрнасці для яе душы.
Цэлебрацыю пахавальнай Імшы ўзначаліў біскуп Гродзенскі Аляксандр Кашкевіч. Іерарх выказаў словы спачування законнай сям’і, да якой належала с. Станіслава.
У гаміліі дырэктар рэлігійнай місіі “Дабрачыннае каталіцкае таварыства “Карытас”” Мінска-Магілёўскай архідыяцэзіі а. Анатоль Ярошка OFMCap нагадаў біяграфію спачылай. Святар падкрэсліў, што законніца вызначалася вялікай пакорай і сціпласцю і застанецца ў сэрцах людзей, якіх ёй дадзена было сустрэць, як сціплая і пабожная асоба.
Па словах айца капуцына, сястра была заўсёды адданай Богу, поўнай энергіі і духоўнага дынамізму, а свой крыж ахвяроўвала ў інтэнцыі новых пакліканняў да святарства і кансэкраванага жыцця, за святы Касцёл, парафію ў Слоніме і Ордэн Меншых Братоў Капуцынаў, прадстаўнікі якога там служаць.
Пасля заканчэння Імшы пробашч парафіі а. Юрый Катовіч OFMCap узначаліў у касцёле абрад развітання са спачылай. Потым у атмасферы малітвы і засяроджанасці труну з целам сястры праводзілі на мясцовыя могілкі, дзе адбылося пахаванне.
Будзем прасіць міласэрнага Бога, каб за вялікае прысвячэнне і законнае жыццё, якое мела кантэмпляцыйна-клаўзуровы характар, Ён адарыў сястру Станіславу жыццём вечным.
Кс. Юрый Марціновіч
