Духавенства падзякавала арцыбіскупу намінату Станеўскаму за служэнне ў Гродзенскай дыяцэзіі

18 кастрычніка, у свята св. Лукі, евангеліста, у гродзенскім касцёле Адшукання Святога Крыжа (пабернардынскім) сабраліся на малітве сёстры законныя і святары, якія служаць у Гродзенскай дыяцэзіі.

У межах дня засяроджання прысутныя выслухалі канферэнцыю, удзельнічалі ў адарацыі Найсвяцейшага Сакрамэнту.

Кульмінацыяй сустрэчы была святая Імша, на якой духавенства, асобы кансэкраванага жыцця і студэнты Вышэйшай духоўнай семінарыі ў Гродне дзякавалі новапрызначанаму арцыбіскупу Мітрапаліту Мінска-Магілёўскаму Юзафу Станеўскаму за служэнне ў дыяцэзіі.

У гэтыя дні завяршаецца яго праца ў Касцёле на Гродзеншчыне, дзе спачатку ён служыў як святар, будучы шмат гадоў рэктарам семінарыі, а пасля як дапаможны біскуп і генеральны вікарый дыяцэзіі.

Эўхарыстыю ўзначаліў сам прызначаны 14 верасня на пасаду Мітрапаліта Мінска-Магілёўскага Юзаф Станеўскі.

У гаміліі іерарх адзначыў важнасць вялікай і руплівай малітвы ў інтэнцыі новых пакліканняў да служэння ў Касцёле. Звяртаючыся да святароў і кансэкраваных асобаў, ён падкрэсліў, што вельмі важнае ўласнае сведчанне жыцця, каб іншыя, асабліва маладыя людзі, праз гэты прыклад самі хацелі прысвяціць сябе служэнню Пану Богу.

Арцыбіскуп намінат дадаў, што сам у юнацтве палюбіў Бога і Касцёл дзякуючы пробашчу яго роднай парафіі ў Заневічах а. Казіміру Жылісу, езуіту, які адышоў у вечнасць у гэтым годзе, і дзякуючы яго рупліваму служэнню адкрыў пакліканне да святарства.

Іерарх падкрэсліў важнасць жыцця Евангеллем, якое згодна з яго біскупскім дэвізам належыць абвяшчаць з радасцю і ўласным жыццём, каб людзі, бачачы нашыя ўчынкі, таксама хацелі праслаўляць Пана.

Новапрызначаны Мітрапаліт Мінска-Магілёўскі падзякаваў біскупу Гродзенскаму за ўдзеленыя яму дыяканскае, прэзбітэрскае і біскупскае пасвячэнні. Таксама ён падзякаваў святарам і сёстрам законным за супольны шлях і ажыццяўленне Хрыстовай просьбы “ідзіце і навучайце”.

Іерарх прасіў аб малітве ў яго інтэнцыі і інтэнцыі ўсіх тых, да якіх яго пасылае Папа Францішак.

Пасля Імшы біскуп Гродзенскі Аляксандр Кашкевіч звярнуўся да арцыбіскупа наміната, падзякаваўшы яму за служэнне ў дыяцэзіяльнай сям’і ў выкананні розных функцый і задач. Іерарх пажадаў новапрызначанаму Мітрапаліту Мінска-Магілёўскаму стаць для сваіх новых вернікаў арцыпастырам чалавечых сэрцаў, каб несці ім радасць Евангелля.

Ад імя духавенства і сясцёр законных віншаванні з нагоды высокага прызначэння выказаў канцлер Гродзенскай курыі кс. канонік Аляксандр Мацкевіч.

Таксама выказалі цёплыя словы і запэўнілі ў сваёй нястомнай малітве і жаданні далейшага супрацоўніцтва прадстаўнікі Францішканскага ордэну свецкіх.

Кс. Юрый Марціновіч