27 чэрвеня біскуп Гродзенскі Аляксандр Кашкевіч нанава асвяціў адноўленую прыдарожную капліцу ў гонар св. Яна Хрысціцеля, якая знаходзіцца недалёка ад Вішнева (Смаргонскі дэканат).
Падчас Эўхарыстыі, якая цэлебравалася ў лесе побач з адноўленай капліцай, іерарх удзяліў сакрамэнт канфірмацыі групe моладзі, адпаведна падрыхтаванай да гэтай падзеі.
За аднаўленне капліцы, якая была пабудавана не менш за трыста гадоў таму, узяўся прадпрымальнік Францішак Жылка з Мінска, які нарадзіўся недалёка ад гэтых мясцінаў. У вішнеўскай парафіі да 1900 года жылі яго продкі. Мецэнат упэўнены, што яны неаднаразова маліліся ў гэтай капліцы.
Звяртаючыся да ўсіх прысутных на ўрачыстасці, Францішак Жылка папрасіў мясцовых вернікаў клапаціцца пра адноўленую капліцу, каб яна заўсёды ззяла і радавала вока тых, хто праходзіць побач.
У межах прац па аднаўленні капліцы была ўпарадкавана таксама тэрыторыя каля яе, дзе дзякуючы старанням мясцовага пробашча кс. Антонія Казлоўскага была змешчана новая фігура св. Яна Хрысціцеля.
У гаміліі біскуп Аляксандр Кашкевіч казаў пра святога Яна, бо ў гэты дзень вішнеўская парафія адзначала адпустовую ўрачыстасць у яго гонар.
Як падкрэсліў іерарх, няма сумненняў, што нашы папярэднікі, якія былі фундатарамі і будаўнікамі гэтай каплічкі, захапляліся асобай Яна Хрысціцеля, у малітвах заклікалі яго заступніцтва, жадалі наследаваць яго ва ўласным жыцці і паводзінах.
Таму біскуп запрасіў усіх прысутных задумацца над тым, што найбольш прыцягальнага і годнага наследавання сучасныя людзі могуць убачыць у асобе гэтага святога, чым ён можа сёння захапіць і чаму навучыць, якім чынам указаць правільны кірунак на шляху да святасці.
“Ян Хрысціцель з’яўляецца для нас узорам бескампраміснага, адважнага, гераічнага прапаведніка праўды. Ён вучыць нас, што нельга ісці на кампраміс са злом, нельга быць хісткім трыснягом, які гайдаецца направа і налева за кожным павевам ветру”, – сказаў іерарх.
Пастыр Касцёла на Гродзеншчыне падкрэсліў, што “нельга быць людзьмі без поглядаў і перакананняў, якія кіруюцца толькі ўласнымі страхамі і чалавечымі меркаваннямі”; што “хрысціянін павінен быць чалавекам адвагі, які жыве ў праўдзе, практыкуе ў жыцці тыя каштоўнасці, якія вызнае вуснамі”.
Біскуп заахвоціў вернікаў і далей прабываць з Хрыстом і даваць пра Яго прыгожае сведчанне словам і ўчынкам.
На заканчэнне Эўхарыстыі іерарх падзякаваў усім, хто садзейнічаў аднаўленню прыдарожнай капліцы. Словы ўдзячнасці ён выказаў кс. Антонію Казлоўскаму за яго руплівасць і ўсе звязаныя з гэтым намаганні, а тым, хто непасрэдна прычыніўся да аднаўлення хрысціянскай спадчыны на нашых землях, біскуп уручыў падзячныя граматы, а таксама ўдзяліў пастырскае благаслаўленне.
Прэс-служба Гродзенскай дыяцэзіі
Фота: Віктар Ведзень