У Гродне ўпершыню адбыўся “Сужэнскі курс”. Сустрэчы праходзілі раз у месяц у парафіі Найсвяцейшага Адкупіцеля (Дзевятоўка) на працягу сямі месяцаў.
Гэты курс, удзельнікі якога – выключна сужэнцы, унікальны тым, што сустрэчы праводзяць сямейныя пары. Яго задачай з’яўляецца зблізіць сужэнцаў праз стварэнне атмасферы спаткання, схіліць да размоваў і вырашэння складаных пытанняў, якія, магчыма, не ляжаць на паверхні.
Курс быў арганізаваны супольнасцямі “Вучні-місіянеры благаслаўлёнага Каспера Штангасінгера” парафіі Найсвяцейшага Адкупіцеля і “Эхад” катэдральнай парафіі св. Францішка Ксаверыя ў Гродне. Духоўнікамі падчас сустрэч былі а. Андрэй Урублеўскі CSsR і кс. Андрэй Каўшук.
Тэмы курсу датычацца асноўных напрамкаў у сямейных адносінах – размовы, прабачэнне, сексуальныя адносіны, вырашэнне канфліктаў, адносіны з бацькамі і іншае. Лідары курсу ўводзяць у тэму, дзеляцца сваімі сведчаннямі. Удзельнікі ў парах выконваюць заданні, дыскутуюць на дадзеную тэму.
Па словах удзельнікаў, гэты час быў карысным досведам для іх адносінаў:
“Вельмі складана вылучыць час адно для аднаго, бо мы выкарыстоўваем кожную магчымасць па-за працай і якімісьці іншымі абавязкамі, каб быць разам з дзецьмі. Гэтага часу і так мала… Але які ж неабходны, які ж каштоўны час знаходжання разам з сужэнцам. Гаворка не толькі пра знаходжанне побач, але перш за ўсё пра кантакт, размовы. Сужэнскі курс быў нагодай для гэтых сустрэч удваіх”.
“На курсе быў зададзены напрамак па тэмах. Мы прывыклі размаўляць на бытавыя тэмы, вырашаць пытанні з дзецьмі, працоўныя, хатнія. Мы тым самым быццам бы клапоцімся адно пра аднаго, але часта здараецца неразуменне. Каштоўны быў абмен адказамі з жонкай. Калі мы абмяркоўвалі адказы, мы станавіліся бліжэй адно аднаму, бо закраналі часам вельмі інтымныя тэмы. Я навучыўся звяртаць увагу на тое, што яна перажывае”.
“Мы з жонкай узрастаем у Хрысце. Але гэта часта асацыюецца з дзвюма паралелямі – кожны сваім шляхам. Сужэнцам неабходны адпаведны пасілак для іх з’яднання. Вельмі важны досвед іншых хрысціянскіх сем’яў, іх сведчанні. Дзякуючы гэтаму курсу адносіны ў сужэнстве сталі прыярытэтнымі. Нам бы хацелася працягваць рэгулярныя размовы ў асяроддзі хрысціянскіх сем’яў”.
“Я ўсвядоміла патрэбы свайго партнёра. Мне не трэба яго прыладжваць пад свае чаканні. Пра гэтыя чаканні мы пачалі гаварыць адно з адным. Мы іх разам карэктуем”.
Ірэна Канарская
