Традыцыйныя дываны з кветак на ўрачыстасць Божага Цела падрыхтавалі ў Іўі

6 чэрвеня ў парафіі святых апосталаў Пятра і Паўла ў Іўі адбылася працэсія Божага Цела. Да яе былі падрыхтаваны чатыры алтары, упрыгожаныя дыванамі з кветак.

Працэсіі папярэднічала святая Імша, на якой удзельнікі малiлiся за Каталiцкi Касцёл ва ўсiм свеце, сваю малую радзiму, супакой на зямлі, любоў у сем’ях і здароўе блізкіх; аб тых, хто па стану здароўя не змог прыйсці на гэтае прыгожае свята, і тых, хто страціў дарогу да Бога. Маліліся за раённыя ўлады i дабрабыт iўеўчан, а таксама за тых, хто ў гэты дзень прачнуўся вельмi рана, каб упрыгожыць алтары, i паставіўся да гэтага творча i з вялiкай адказнаcцю.

Да стварэння алтароў у Іўі вельмі сур’ёзны падыход. Спачатку вызначаюцца духоўныя асобы, малітоўныя суполкі і жыхары горада, якія на працягу тыдня збіраюцца, каб прыдумаць дызайн, рыхтуюць матэрыялы і кветкі. Раніцай перад працэсіяй іўеўчане ўсталёўваюць алтары і выкладаюць дываны.

На дыванах адлюстроўваюцца эўхарыстычныя сімвалы і матывы. Стваральнікі дэкарацый такім чынам выражаюць пашану да Найсвяцейшага Сакрамэнту.

Самым вялікім атрымаўся дыван каля помніка ў гонар адзінства і сяброўства канфесій Іўешчыны. На ім былі словы “Езу, давяраю Табе!”, у яго стварэнні прынялі ўдзел бацькі дзяцей, якія тыдзень таму прыступілі да Першай Камуніі. Падчас працэсіі хлопчыкі і дзяўчынкі нават сталі часткай алтара, упрыгожыўшы яго.

На заканчэнне працэсіі пробашч парафіі кс. Ян Гавецкі падзякаваў райвыканкаму, супрацоўнікам ДАІ, парафіянам і ўсім, хто далучыўся да яе арганізацыі і правядзення.

Раман Ярмош