15 снежня ў Беларусь прыбудзе Агонь міру з Бэтлеема. Па традыцыі яго спачатку даставяць у катэдральны касцёл св. Францішка Ксаверыя ў Гродне, затым каталіцкія скаўты будуць перадаваць яго далей.

Урачыстае ўнясенне агню ў гродзенскую катэдру адбудзецца ў 11.30, у 12.00 пройдзе святая Імша, пасля якой агонь распачне падарожжа па нашай краіне.

Скаўты развязуць агонь у розныя месцы, адкуль усе жадаючыя змогуць узяць яго дадому, каб адзначаць Божае Нараджэнне ў духоўнай лучнасці з зямлёй Збаўцы.

Акцыя перадачы Бэтлеемскага агню пачалася ў 1986 годзе, калі прадстаўнікі Аўстрыйскай тэлерадыёкампаніі ўпершыню прывезлі запаленую ў Бэтлееме лампаду, каб перад Божым Нараджэннем падтрымаць хворых і самотных людзей. Ініцыятыву перанялі аўстрыйскія скаўты, праз год перадсвяточная акцыя стала міжнароднай. Яе падтрымліваюць на афіцыйным узроўні як кіраўнікі хрысціянскіх Цэркваў Еўропы, так і прадстаўнікі дзяржаўных уладаў розных краін.

У 1998 годзе агонь быў перададзены ў 22 еўрапейскія краіны, у тым ліку ў Беларусь дзякуючы сябрам польскага згуртавання скаўтаў ZHP. У 2008 годзе да акцыі ўпершыню далучыліся скаўты з каталіцкіх парафіяльных супольнасцяў нашай краіны.

Дэвіз сёлетняй акцыі перадачы Бэтлеемскага агню – “Будзем чыніць мір”.

Прэс-служба Гродзенскай дыяцэзіі

19 снежня ў катэдральны касцёл св. Францішка Ксаверыя ў Гродне прыбыў Агонь міру, запалены ад нязгаснай лампады ў базыліцы Нараджэння Пана ў Бэтлееме.

Прадстаўнікі польскага згуртавання скаўтаў ZHP урачыста перадалі агонь біскупу Гродзенскаму Аляксандру Кашкевічу.

Як сказаў біскуп, звяртаючыся да ўсіх прысутных у катэдры, гэты агонь нагадвае, што ўжо хутка мы будзем адзначаць поўныя радасці і хвалы святы Божага Нараджэння.

Іерарх падкрэсліў, што з гэтага святла, якое сімвалізуе Езуса Хрыста, “мы хочам зачэрпаць святло для саміх сябе – для кожнай і кожнага з нас”.

“Больш за тое, мы жадаем гэтае святло, якое ў нас ужо ёсць, перадаваць далей. Каб усё больш людзей было ахоплена гэтым святлом, якое ўпершыню заззяла на зямлі ў цудоўную ноч Божага Нараджэння”, – дадаў біскуп.

Пастыр Касцёла на Гродзеншчыне адзначыў, што “ў нашы сённяшнія часы жаданнем кожнага чалавека з’яўляецца тое, каб разам з гэтым святлом нашы дамы і сем’і, нашу краіну і ўвесь свет агарнуў доўгачаканы мір”, “каб мы былі здольныя прабачаць адзін аднаму, падаваць руку, пазбягаць гневу і нянавісці, а думкі нашыя заўсёды былі поўныя дабрыні”.

Біскуп заахвоціў вернікаў несці з гэтым агнём да сваіх блізкіх і знаёмых радаснае пасланне міру і быць вестунамі Божай радасці.

“Няхай іншыя бачаць у нас людзей добрай волі, якіх Пан Бог упадабаў. Будзем абвяшчаць іншым самога Хрыста, які прыйшоў для таго, каб нас усіх адарыць супакоем”, – сказаў іерарх.

Затым усе ахвотныя маглі запаліць ад Бэтлеемскага агню свае знічы, каб занесці яго святло ў свае дамы і сем’і.

Такім чынам усе могуць на працягу кожнага дня да Божага Нараджэння ўзяць гэты сімвал з сабой, каб перажываць святы ў духоўнай лучнасці з зямлёй нашага Збаўцы.

Прэс-служба Гродзенскай дыяцэзіі

Фота: Вольга Сяліцкая

17 снежня ў гродзенскі катэдральны касцёл св. Францішка Ксаверыя быў унесены Бэтлеемскі агонь міру, які даставілі харцэры з польска-беларускай мяжы. Менавіта з горада над Нёманам пачалася штогадовая скаўцкая эстафета агню па гарадах і мястэчках Беларусі.

Урачыста прывітаў гэты незвычайны знак біскуп Гродзенскі Аляксандр Кашкевіч. Іерарх адзначыў, што сёлетняя акцыя дзялення агнём, які да нас даходзіць з пячоры ў базыліцы Нараджэння ў Бэтлееме ў Палестыне, адбываецца пад дэвізам “Святло служэння”. 

Біскуп падкрэсліў, што ў гэты цяжкі час, калі ўвесь свет закрануты пандэміяй каранавірусу, a шмат нашых блізкіх перажываюць цярпенні і пачуццё няўпэўненасці, да нас у чарговы раз прыходзіць маленькае Полымя надзеі. 

“Таму сёлета разам з гэтым святлом мы хочам занесці цеплыню Езусавага полымя ў нашы дамы, касцёлы, капліцы, на месцы нашай працы, каб яно асвятляла закуткі памяшканняў, у якіх мы жывём, молімся і працуем, але найперш у чалавечыя сэрцы, гатовыя да прыняцця Езуса і Яго любові”, – дадаў іерарх. 

Пастыр Касцёла на Гродзеншчыне адзначыў, што сёння, як ніколі, нашым братам і сёстрам патрэбна наша cлужэнне, знакам якога з’яўляецца Бэтлеемскае святло міру, наша блізкасць, адвага і сведчанне.

“Несучы Святло з Бэтлеема ў гэтым годзе, дапаможам сабе і іншым перамагчы пачуццё няўпэўненасці, а таксама прычыны страху, які робіць людзей закрытымі. Няхай гэтае маленькае полымя, знак, што “Пан блізка”, запоўніць час чакання нараджэння Бога, які вылечыць, абновіць і ўмацуе чалавецтва, якое прагне сапраўднага збаўлення”, – сказаў біскуп. 

Іерарх падзякаваў усім, хто ўдзельнічае ў перадачы гэтага сімвалу Божага Нараджэння. Словы ўдзячнасці ён выказаў харцэрам, якія прынеслі агонь у Гродна як знак Езуса Хрыста, які прыходзіць да нас у таямніцы свайго Нараджэння. Менавіта дзякуючы іх удзелу перадача Бэтлеемскага агню стала пастаянным элементам калядных традыцый у горадзе над Нёманам.

  Іерарх падзякаваў таксама скаўтам, якія занясуць гэты агонь у іншыя парафіяльныя супольнасці нашай краіны.

“Вы сімвалічным чынам будзеце вестунамі блізкіх святаў Божага Нараджэння. Няхай гэтае ганаровае заданне яшчэ больш мабілізуе вас штодзённа крочыць за Езусам і даваць пра Яго сведчанне словам і ўчынкам”, – сказаў біскуп.

Потым скаўты перададуць агонь у іншыя месцы нашай краіны. Дзякуючы гэтаму ён будзе даваць моц не толькі ім самім, але і ўсім, да каго яны яго занясуць.

А занесены ён будзе да ўсіх хрысціян, якія ў найбліжэйшыя дні будуць перажываць святы Божага Нараджэння. Ён будзе занесены ў шпіталі, хоспісы, да састарэлых, самотных і пакінутых. Разам з гэтым агнём да іх занясуць надзею і моц.

Акцыя Бэтлеемскага агню міру бярэ пачатак у Аўстрыі ў 1986 г. Агонь перадаецца з рук у рукі з Бэтлеема. У гроце Нараджэння Пана гарыць вечны агонь. Менавіта ад яго штогод запальваецца лампада, полымя якой, што нясуць скаўты праз краіны і кантыненты, абыходзіць свет.

Кс. Юрый Марціновіч

Фота: Вольга Сяліцкая