У Ваўкавыску памаліліся за кс. каноніка Алега Дуля ў 30-ы дзень яго смерці

04 Мая 2020

30dzen 36 2 мая ў парафіяльным касцёле св. Станіслава Косткі ў Ваўкавыску адбылася святая Імша ў інтэнцыі кс. каноніка Алега Дуля ў 30-ы дзень пасля яго смерці.

Святую Імшу ўзначаліў Генеральны вікарый Гродзенскай дыяцэзіі біскуп Юзаф Станеўскі. Іерарх заахвоціў усіх да супольнай малітвы за памерлага святара, які служыў сваім вернікам да самага канца.

Ксёндз Алег у Гродзенскай дыяцэзіі і за яе межамі быў вядомы як добры арганізатар аўтобусных пілігрымак да святых месцаў ва ўсёй Еўропе. Вернікі вельмі ахвотна прымалі ўдзел у гэтых пілігрымках, якія для іх былі нагодай паглыбіць сваю веру і ўбачыць прыгажосць свету.

На Эўхарыстыі сабраліся парафіяне, каб у малітве падзякаваць Пану Богу за дар жыцця свайго святара, які апошнія 13 гадоў быў іх душпастырам. Святар таксама прычыніўся да будаўніцтва святыні, якая была ўрачыста асвячана 13 чэрвеня 2015 г. арцыбіскупам Клаўдыё Гуджэроціі, тагачасным Апостальскім Нунцыем у Беларусі.

Гамілію падчас Імшы прамовіў кс. канонік Генрык Яблонскі, пробашч парафіі Найсвяцейшай Тройцы ў Забалаці – роднай парафіі кс. Алега Дуля.

30dzen 38

Ксёндз канонік Алег Дуль нарадзіўся ў 1973 г. у в. Падгалішкі, якая належыць да парафіі Найсвяцейшай Тройцы ў Забалаці (Радунскі дэканат).

У 1997 г. скончыў Вышэйшую духоўную семінарыю ў Гродне, 16 кастрычніка 1999 г. атрымаў прэзбітэрскае пасвячэнне з рук біскупа Аляксандра Кашкевіча.

З 1999 па 2000 гг. служыў вікарыем у сваёй роднай парафіі ў Забалаці, адначасова абслугоўваў парафію Унебаўзяцця Найсвяцейшай Панны Марыі ў Начы, Божай Міласэрнасці ў Доцішках і св. Юрыя ў Асаве.

З 2000 г. распачаў служэнне ў якасці пробашча ў парафіі ў Начы.

З 2007 года быў пробашчам парафіі св. Станіслава Косткі і дэканам Ваўкавыскага дэканату.

Памёр 3 красавіка 2020 г. у Ваўкавыску, на наступны дзень пасля смерці свайго бацькі.