У міжнародны Дзень памяці ахвяраў Халакосту акцёры фрык-тэатра “Гексаген” прайшлі ў касцюмах вязняў гета па цэнтры Гродна.
Як паведамляе hrodna.life, aкцыю арганізавалі, каб нагадаць гараджанам пра загінуўшых у лагерах смерці суайчынніках.
Кіраўнік фрык-тэатра “Гексаген” Васіль Калач адзначыў, што гэты перформанс – даніна памяці гродзенцам, якія загінулі ў лагерах смерці падчас Другой сусветнай вайны.
“Мы, артысты фрык-тэатра “Гексаген”, не юдэі. Тэма ахвяраў Халакосту – толькі частка нашай працы. Але гродзенскае гета – гістарычная рэальнасць нашага горада. Сведчанне болю, крыві, бруду і слёз. Сведчанне жахлівых злачынстваў азвярэлых фанатыкаў. Сведчанне ўнутранага гераізму жыхароў Гродна – яўрэяў-ахвяраў Халакосту і тых, хто, рызыкуючы жыццём, ратаваў іх пасля расфарміравання гета”, – адзначыў Васіль Калач.
Кіраўнік фрык-тэатра “Гексаген” дадае, што трэба пагрузіцца ва ўспаміны: “Прапусціць праз сваю душу. І пражыць для тых, хто на нас глядзіць, усё тое, пра што глядач можа нават не здагадвацца. І мы робім гэта”.
Таму, па яго словах, удзельнікі фрык-тэатра стараюцца данесці не голую інфармацыю, а суперажыванні, каб іншыя маглі паразважаць разам з імі.
У час Другой сусветнай вайны з 29 тысяч гродзенскіх яўрэяў у жывых засталося каля 200 чалавек. Большая частка загінула ў канцлагеры Аўшвіц-Біркенаў. Жыць пасля вайны ў Гродна вярнуліся толькі некалькі дзясяткаў яўрэяў. Варта адзначыць, што з Гродна ў лагеры смерці траплялі не толькі яўрэі, але і палякі з беларусамі.
Фота: Hrodna.life
