Ліпнішкі: сужэнцы аднавілі шлюбныя абяцанні

27 кастрычніка ў парафіі Св. Казіміра ў Ліпнішках (Іўеўскі дэканат) падчас святой Імшы дзясяткі параў урачыста аднавілі сужэнскія абяцанні. Нагодай да гэтага было заканчэнне 40-гадзіннага набажэнства ў парафіі.

Эўхарыстыю ўзначаліў біскуп Гродзенскі Аляксандр Кашкевіч, які прыбыў па запрашэнні братоў капуцынаў, якія служаць у парафіі.

Сужэнцы сталі ўздоўж святыні і ў прысутнасці членаў сваіх сем’яў аднавілі абяцанні перад Богам і супольнасцю Касцёла. Гэты абрад стаў магчымасцю для ўмацавання сужэнскай і сямейнай сувязі.

Таксама гэта была нагода прыгадаць сабе пра прыгажосць любові, якой сужэнцаў адарыў Бог у гэтым сакрамэнце. Для сужэнцаў і іх дзяцей гэты сакрамэнт – дар для асвячэння і збаўлення.

Біскуп Кашкевіч падчас Імшы падкрэсліў, што сям’я – фундамент усяго чалавечага грамадства і яго будучыні. Пастыр Касцёла на Гродзеншчыне падзякаваў сужэнцам за вернасць іх прысязе і заахвоціў даваць сведчанне любові, асабліва ў дачыненні адно да аднаго і ў сям’і.

Іерарх падкрэсліў, што трыванне ў сакрамэнтальным саюзе – важны знак веры для іншых сужэнстваў, якія жывуць “па-сучаснаму”. Ён прасіў, каб кожная сям’я станавілася хатнім Касцёлам, каб сувязі еднасці і любові, якія злучаюць членаў сям’і, натхнялі да пошуку Бога, знаходжання Яго і адкрыцця на Яго.

На заканчэнне словы ўдзячнасці біскупу выказалі сужэнцы і пробашч парафіі а. Андрэй Зуй OFM Cap.

Кс. Юрый Марціновіч