Усталяваную каля аграгарадка Дварышча Лідскага раёна фігуру Езуса Хрыста ведаюць не толькі мясцовыя жыхары.
Ля фігуры штогод спыняюцца з малітвай сотні пілігрымаў, якія ідуць ушанаваць цудатворны абраз Маці Божай Тракельскай. Між сабой вернікі нават празвалі гэтае месца “Гарой прабачэння”. У апошні час яно знаходзілася ў не вельмі прыгожым стане: напаўразбураная каменная агароджа, кустоўе, якое разраслося па яе перыметры.
Як паведамляе "Лідская газета", некалькі месяцаў таму тут пачаліся працы па добраўпарадкаванні. Ініцыятыва належыць кусташу санктуарыя Гродзенскай дыяцэзіі Маці Божай Каралевы нашых сем’яў у Тракелях кс. доктару Юрыю Бяганскаму.
“Гэта святое месца, да яго трэба ставіцца з павагай. У 1800-я гады тут стаяў касцёл Маці Божай Ружанцовай, які пасля быў разбураны. Напамінам пра існаванне тут святыні служаць старыя каталіцкія могілкі, усталяваная потым фігура Езуса Хрыста”, - кажа святар.
Ксёндз Бяганскі адзначае, што фігура Збаўцы знаходзіцца яшчэ ў больш-менш нядрэнным стане, усё астатняе патрабуе добраўпарадкавання. Асабліва могілкі, дзе асобныя пахаванні датуюцца XVII стагоддзем.
“Зразумела, што пад уздзеяннем часу многія надмагіллі ўраслі ў зямлю, помнікі нахіліліся або зусім упалі, да таго ж магілы літаральна паглынулі дрэвы і кустоўе. Канешне, сітуацыя патрабавала ўмяшальніцтва”, - дадае святар.
Ён звярнуўся да старшыні Дварышчанскага сельсавета Ніны Зуенка з прапановай навесці тут парадак. Старшыня ініцыятыву не толькі падтрымала, але і аказала садзеянне.
Рамонтна-будаўнічыя працы пачаліся ў сакавіку. Яны вядуцца сіламі мясцовых вернікаў, дармовую дапамогу аказваюць спонсары.
“За гэты час мы змаглі выдаліць дрэвы, выразаць кустоўе, аднавіць разбураную каменную агароджу”, - пракаментавала старшыня Дварышчанскага сельсавета.
Гэты праект доўгатэрміновы. Завяршыць яго хочуць да лета 2020 г. Па словах кс. Юрыя Бяганскага, усе помнікі на старых каталіцкіх могілках будуць падняты і нанова ўстаноўлены. Надмагіллі пачысцяць, надпісы на іх асвяжаць фарбай. “Гару прабачэння” засеюць новым газонам, па перыметры агароджы пасадзяць туі.
“У планах адрэстаўраваць і саму фігуру Езуса Хрыста, у прыватнасці, зашкліць яе. Але апошняе будзе залежаць, канешне, ад наяўнасці сродкаў”, - кажа святар.
На днях Лідскі райвыканкам перадаў на дармовай аснове тракельскай парафіі капліцу ў вёсцы Марысева Дварышчанскага сельсавета. Вядома, што яна была пабудавана ў 90-я гады. Аднак узведзены былі толькі сцены, унутраная адробка не вялася.
“У нашай парафіі захоўваецца нават праект, якой гэтая святыня павінна быць. Чаму будаўніцтва было прыпынена, не ведаю. Але мы хочам удыхнуць у капліцу жыццё, праводзіць тут набажэнствы, збірацца на каталіцкія святы і ўрачыстасці. Упэўнены, з Божай дапамогай усё атрымаецца”, - адзначае кс. Бяганскі.
Калі святыня будзе цалкам адрэстаўравана, яе плануецца асвяціць пад тытулам Маці Божай Ружанцовай.
