31 жніўня ў парафіі Узвышэння Святога Крыжа ў Лідзе (Фара) прайшло чуванне моладзі, настаўнікаў і выкладчыкаў. У расклад чування ўвайшлі канферэнцыя, адарацыя Найсвяцейшага Сакрамэнту і святая Імша.
У канферэнцыі ксёндз Дзяніс Бразінскі, вікарый парафіі, разважаў з моладдзю аб тым, як грэх дзейнічае ў нашым жыцці. Святар параўнаў грэх з дайвінгам: «У першы раз пры пагружэнні пад ваду заўсёды цяжка: баішся і не можаш затрымаць дыханне больш чым на паўхвіліны, але раз за разам усё лягчэй. Так і з грахом: зграшыўшы першы раз, адчуваеш дыскамфорт, яшчэ працуе сумленне, але далей гэтае адчуванне дыскамфорту прытупляецца». Прагучала пажаданне заўсёды трымацца Бога, нягледзячы на перашкоды.
Потым адбылася адарацыя. За гэтую гадзіну кожны меў магчымасць сказаць Богу «дзякуй» за ўсе шчаслівыя моманты свайго адпачынку і «прабач» шчырай споведдзю за тыя моманты, калі грэх спакусіў цябе і ты не змог пераадолець яго.
Чуванне скончылася святой Імшой і ўрачыстым благаслаўленнем.
У сваёй прамове кс. Дзяніс пажадаў сабе і моладзі плённа правесці наступны год, развіваючы сябе як у натуральных навуках, так і ў навуцы Божай.
Марыя Чарняк