Tры дні праз маляўнічую Гродзеншчыну: распачаўся апошні этап праз Літву экуменічнай пешай пілігрымкі Беласток – Гродна – Вільня

З 18 па 22 жніўня праз тэрыторыю Гродзенскай дыяцэзіі прайшла ХХVII экуменічная пешая пілігрымка Беласток – Гродна – Вільня. Яе ўдзельнікі наведалі амаль усе каталiцкiя i праваслаўныя святынi, якiя напаткаліся iм па дарозе.

Сустракалi iх сотнi жыхароў Гродна, Азёр, Новага Двара i Радуні, дзе пiлiгрымы затрымлiвалiся на начлег. Тысячы людзей з iншых вёсак i мястэчак, праз якiя праходзiла пiлiгрымка, маглі адчуць клiмат пiлiгрымавання i магчымасць разам малiцца.

Людзi выходзiлi на дарогу, часта цэлымi сем'ямi, каб прывiтаць пiлiгрымку, а таксама дзялiлiся ўсiм тым, што самi маюць. Людзi, якiя ехалi на аўтамабілях, вельмi часта спынялiся. Некаторыя выходзілі і станавiлiся на калені.

Трэба адзначыць, што, як і кожны год, вялікую гасціннасць і самаахвярнасць выявілі жыхары нашых мястэчак і вёсак, якія дзяліліся з пілігрымамі тым, што маюць. Амаль у кожнай мясцовасці яны рыхтавалі пачастунак, найчасцей ля прыдарожных крыжоў ці каплічак. Там, дзе ёсць святыня, пачастунак адбываўся ля касцёла. На стале можна было знайсці ўсё, пачынаючы ад каўбасы і заканчваючы мёдам з уласнай пасекі. Гэтым сустрэчам спадарожнічала вялікая радасць.

Пілігрымы падчас сустрэчы змаглі таксама аддзячыць гасцінным жыхарам нашай краіны. Многія атрымлівалі невялікія падарункі на памяць, дзяцей і моладзь пілігрымы часцей частавалі слодычамі.

22 жнiўня пілігрымы распачалi чарговы дзень свайго шляху да цудадзейнага абраза Мацi Божай Мiласэрнай у Вострай Браме. Падчас ранішняй малітвы ў касцёле Маці Божай Ружанцовай у Радуні яны дзякавалі Богу за ўсіх людзей, ад якіх спазналі на беларускай зямлі шмат дабрыні і сардэчнасці. Гэты дзень для iх стаў развiтаннем з нашай краiнай. Пасля трох поўных дзён крочання праз Беларусь яны перасяклi беларуска-лiтоўскую мяжу.

Мы перакананы, што ў сэрцах пiлiгрымаў засталiся цёплыя ўспамiны аб нашай краiне, бо нашы людзi сапраўды дзялiлiся з iмi не толькi хлебам, а перш за ўсё сваiм сэрцам.

"Колькi буду жыць, столькi буду памятаць пра гэтую дабрыню беларусaў, якiя вiталi нас вельмі шчыра хлебам i соллю! Доўга буду мець перад вачыма сталае пакаленне людзей, асаблiва жанчын у каляровых хустках з iх спрацаванымі далонямi, якiя з вялікай узрушанасцю, з ружанцамi ў руках выходзiлi на дарогу, каб нас падтрымаць!" – адзначае Здзiслаў з Кракава, удзельнік пілігрымкі.

У Вострую Браму пiлiгрымы ўвойдуць 24 жніўня, дзе прымуць удзел у святой Імшы. Афіцыйна пілігрымка завершыцца 25 жніўня супольнай Эўхарыстыяй у віленскай катэдры.

Kс. Юрый Марціновіч

Фота: Міхал Цылвік