30 ліпеня ў парафіі Св. Антонія і Аб’яўлення Пана ў Каменцы (Шчучынскі дэканат) адбылося пахаванне сястры Анджэі (Гэлены) Mарціновіч з Кангрэгацыі Сясцёр Маці Міласэрнасці (Вастрабрамскай). Спачылай было 89 гадоў.
Пахавальную Імшу, на якой сабраліся родныя памерлай, а таксама яе манаская сям’я, узначаліў біскуп Гродзенскі Аляксандр Кашкевіч.
Іерарх адзначыў, што з гэтага свету адыходзіць законніца, якая прысвяціла жыццё служэнню Касцёлу і людзям, рэалізуючы евангельскія рады ўбоства, чыстасці і паслухмянасці.
Пасля Імшы жалобная працэсія скіравалася на мясцовыя могілкі, дзе манахіня была пахавана.
Сястра Анджэя паходзіла з парафіі Унебаўзяцця Найсвяцейшай Панны Марыі ў Адэльску. На працягу свайго манаскага жыцця служыла ў Індуры, Гродне. Шмат гадоў служыла ў парафіі ў Ліпнішках, а апошнюю частку свайго жыцця правяла ў Каменцы.
Кс. Юрый Марціновіч
