Kаманда святароў Гродзенскай дыяцэзіі, якая прадстаўляла Беларусь, стала 12-й на XIII Чэмпіянаце Еўропы сярод каталіцкіх святароў па міні-футболе.
Першае месца заняла каманда Партугаліі, другое – Босніі, трэцяе – Польшчы, якая апошнія шэсць гадоў была чэмпіёнам Еўропы ў гэтых спаборніцтвах.
Чэмпіянат праходзіў з 25 лютага па 1 сакавіка ў Ульцыне ў Чарнагорыі ля вусця ракі Баяны каля мяжы з Албаніяй, над Адрыятычным морам.
Турнір па міні-футболе сярод святароў быў ініцыяваны духавенствам Аўстрыі. Першы чэмпіянат прайшоў у 2004 годзе ў Айзенштаце.
У сёлетнім турніры ў Чарнагорыі ўдзельнічала больш за 250 святароў з 17 каманд. Беларусь прадставілі святары Гродзенскай дыяцэзіі, у пашыраны склад каманды ўвайшло 15 чалавек.
Чэмпіянат Еўропы сярод каталіцкіх святароў па міні-футболе быў таксама часам інтэграцыі духавенства і магчымасцю сустрэцца са святарамі іншых краін. Праграма ўключала канферэнцыі на тэмы, якія датычылі духоўных каштоўнасцяў у спорце, і супольную малітву са штодзённай святой Імшой.
У 2020 годзе чэмпіянат плануюць правесці ў Празе (Чэхія).
Kс. Юрый Марціновіч
Фота: кс. Дзяніс Бразінскі, кс. Артур Малафей
