"Святло, якое яднае". У Гродна прыбыў Бэтлеемскі агонь (+відэа)

21 снежня ў гродзенскі катэдральны касцёл св. Францішка Ксаверыя быў унесены Бэтлеемскі агонь міру, які даставілі харцэры з польска-беларускай мяжы. Менавіта з горада над Нёманам пачалася штогадовая скаўцкая эстафета Бэтлеемскага агню па гарадах і мястэчках Беларусі.

Урачыста прывітаў агонь дапаможны біскуп Гродзенскай дыяцэзіі Юзаф Станеўскі.

“Мы прыносім ліхтарыкі, каб запаліцца святлом Пана. Просім Езуса, які неўзабаве прыйдзе ў гэты свет, каб у нашых сэрцах разгарэлася полымя любові”, - звярнуўся іерарх да вернікаў, якія прыбылі, каб узяць агонь у свае дамы на вігілійны стол. Такім чынам сем’і будуць яднацца вакол нязгаснай прысутнасці Хрыста.

Бэтлеемскі агонь з'яўляецца сімвалам Раства, радасці і надзеі, а таксама адлюстраваннем евангельскага святла, якім Збаўца асвятляе жыццё ўсіх народаў.

Сёлетняя акцыя праходзіць пад назвай “Святло, якое яднае”. Праз гэта арганізатары акцыі звярнулі ўвагу на тое, што аб’ядноўвае нас, што для нас агульнае, і падкрэслілі, што трэба цешыцца тым, што з’яўляецца супольным дабром, а потым шукаць шляху да поўнай еднасці, да паразумення ў справах, дзе мы адрозніваемся.

У Беларусь Бэтлеемскі агонь прыбыў ужо ў 19-ы раз. Яго далейшы шлях будзе пралягаць не толькі праз святыні нашай краіны, але наведае шпіталі, хоспісы, састарэлых, самотных і пакінутых людзей.

Акцыя Бэтлеемскага святла міру бярэ пачатак у Аўстрыі ў 1986 г. Агонь перадаецца з рук у рукі з Бэтлеема. У гроце Нараджэння Пана гарыць вечны агонь. Менавіта ад яго штогод запальваецца лампада, полымя якой, што нясуць скаўты праз краіны і кантыненты, абыходзіць свет.

АМ

Фота: Вольга Сяліцкая