26-27 ліпеня ў межах перэгрынацыі, якая праходзіць у Гродзенскай дыяцэзіі, фігура Маці Божай Фацімскай наведала парафію Узвышэння Святога Крыжа (Фара) у Лідзе.
Вернікі парафіі з вялікай радасцю віталі Панну Марыю. Для кожнага парафіяніна, які знайшоў час на сустрэчу з Маці Божай, гэта быў асаблівы час ласкі. Многія вернікі трымалі ў руках ружанцы, такім чынам быццам спаўняючы просьбу Марыі, скіраваную да траіх дзяцей 100 гадоў таму ў Фаціме: “Дзеці Мае, прамаўляйце Ружанец”.
Ружанец у інтэнцыі ўсёй парафіяльнай супольнасці прамаўляўся таксама супольна. У гэтую малітву ўключыліся семінарысты і моладзь.
У межах перэгрынацыі ў парафіі адбыліся святыя Імшы, падчас якіх вернікі мелі магчымасць пазнаёміцца з фацімскім пасланнем, якое было скіравана прыгожай Пані да свету ў партугальскай зямлі.
Пасля Імшы, якая адбылася ў першы дзень перэгрынацыі ў 22.00, вернікі прайшлі ў працэсіі, несучы фігуру. Такім чынам яны жадалі выразіць сваю любоў да Езуса, шлях да якога паказвае Марыя.
Падчас перэгрынацыі пробашч кс. канонік Уладзімір Гуляй даручыў усіх, хто ўтварае парафіяльную супольнасць у лідскай Фары, апецы Найсвяцейшай Панны Марыі.
Час наведвання фігурай Марыі лідскай парафіі завяршыўся. Фігура вырушыла ў далейшы шлях праз дыяцэзію, каб умацоўваць у веры іншых. Парафіяне, заахвочаныя словамі Маці Божай, якія неаднаразова ўзгадваліся ў гэты час, засталіся, каб трываць на малітве, чыніць пакаянне і навяртаць свае сэрцы.
Томаш Мікалайчык, семінарыст
