24 красавіка адбылася пілігрымка выпускнікоў гэтага года са Шчучына ў Нацыянальны Санктуарый у Будславе. Мэтай паездкі стала малітва моладзі ў інтэнцыі добрай здачы экзаменаў, а таксама выбару добрага жыццёвага шляху. У гэтых інтэнцыях у святыні для іх адправілі св. Імшу.
Падчас дарогі да Будслава, як і вяртаючыся назад, вучні маглі ўбачыць шмат цікавых мясцовасцяў і святынь Беларусі: касцёл св. Пятра і Паўла ў Іўі і Найсвяцейшай Тройцы ў Гервятах, найвялікшае возера ў Беларусі - Нарач - і мемарыяльны комплекс, які нагадвае пра злачынствы фашыстаў, здзейсненыя ў Хатыні.
Таксама было арганізавана паломніцтва для моладзі, якая збіраецца прыступіць да сакраманту канфірмацыі. У рамках падрыхтоўкі да прыняцця сакраманту сталасці, маладыя вернікі накіраваліся ў санктуарый у Тракелях.
Тэкст: а. Віталій Слука SP
Фота: Людміла Казлова, Анастасія Ясюкевіч
