19-20 лютага ў Гродне прайшлі рэкалекцыі для катэхетаў Гродзенскай дыяцэзіі. У рэкалекцыях, арганізаваных Аддзелам каталіцкага навучання і выхавання Гродзенскай курыі, удзельнічалі кансэкраваныя і свецкія асобы, якія катэхізуюць на тэрыторыі дыяцэзіі.
Рэкалекцыйныя навукі прамовіў а. Марыюш Мазуркевіч CSsR, які падчас практыкаванняў прапанаваў тэму “Ідзіце і абвяшчайце”. Святар заклікаў удзельнікаў сеяць зерне Божага слова ў глыбіні чалавечых сэрцаў, пры гэтым падкрэсліўшы, што кожны катэхет – абраная прылада Бога і пакліканы адважна перадаваць праўды веры.
Айцец Марыюш Мазуркевіч заахвоціў, каб кожны, хто перадае праўды хрысціянскай веры маладым пакаленням, рабіў гэта з вялікай любові да Бога і людзей, а не з абавязку ці прымусу.
Падчас двухдзённых рэкалекцый святар у сваіх канферэнцыях разважаў над тым, як павінна адбывацца абвяшчэнне Пана Бога вернікам у наш час, поўны новых дасягненняў, у эру інтэрнэту.
Як адзначыў кс. Мазуркевіч, кожны катэхет павінен не абвяшчаць сваю ўласную навуку, а вучыць ад імя Касцёла, павінен браць адказнасць за свет і пакаленне людзей.
Рэкалекцыі завяршыліся святой Імшой у рэктаральным касцёле Звеставання Найсвяцейшай Панне Марыі. Эўхарыстыю ў інтэнцыі ўсіх катэхетаў дыяцэзіі ўзначаліў дапаможны біскуп Гродзенскай дыяцэзіі Юзаф Станеўскі. Іерарх падзякаваў усім тым, хто з вялікай адказнасцю і запалам падыходзіць да сваёй справы – абвяшчэння Божага слова і катэхізацыі дзяцей і моладзі.
Біскуп заклікаў, каб кожны катэхет найперш прыкладам свайго штодзённага жыцця і самапрысвячэння быў відавочным знакам для свету і людзей і даваў прыклад адданага служэння.
Кс. Юрый Марціновіч