12-13 лістапада вернікі парафіi Унебаўзяцця Найсвяцейшай Панны Марыі i св. Язафата Кунцэвіча ў Сапоцкіне здзейснілі аўтобусную пілігрымку ў Вільнюс. Напрыканцы Юбілейнага Года Міласэрнасці яны наведалі Тую, якая свеціць у Вострай Браме, каб падзякаваць за ўсе атрыманыя дары і ласкі і даверыцца Яе далейшай мацярынскай апецы.
Група з 52 чалавек наведала капліцу цудатворнага абраза Найсвяцейшай Панны Марыі, Маці Міласэрнасці. Дзелячыся сваімі ўражаннямі, вернікі адзначаюць, што найбольш узрушальным момантам пілігрымкі быў для іх удзел у святой Імшы ў капліцы Маці Божай. Яны прызнаюцца, што гэта непаўторнае перажыванне і незабыўны досвед – быць побач з Марыяй, адчуваць Яе чулы позірк, мацярынскі клопат і цеплыню.
Пасля сустрэчы з Маці Міласэрнасці пілігрымы, умацаваныя такім чынам у веры і духоўна адноўленыя, наведалі гістарычныя мясціны Вільнюса, якія асабліва звязаны з культам Божай міласэрнасці. Яны памаліліся перад арыгіналам абраза Езуса Міласэрнага, які быў напісаны паводле ўказанняў самога Хрыста і стварэнне якога адбылося дзякуючы аб’яўленням святой Фаўстыне Кавальскай.
Пілігрымы вельмі ўдзячныя ўсім арганізатарам паездкі за стварэнне адпаведных умоваў, каб як мага больш урачыста завяршыць Год Міласэрнасці.
Кс. Юрый Марціновіч
