19 снежня ў шчучынскай парафіі айцоў-піяраў прайшла аплаткавая сустрэча дзяцей і моладзі з Літургічнай службы алтара, удзельнікаў моладзевага хору “Каласанс” і іх бацькоў. Трэці год запар такія сустрэчы збіраюць каля сотні ўдзельнікаў. Падобныя сустрэчы - гэта прыгожая традыцыя супольнай малітвы і супольнага стала бацькоў са сваімі дзецьмі.
Сустрэча пачалася супольнай малітвай - Вяночкам да Божай Міласэрнасці - ў парафіяльнай святыні. У малітве дзеці і бацькі прасілі аб супакоі ў сваіх сем’ях, а таксама маліліся за супакой у тых сем’ях, дзе яго няма. Пасля ўрачыстага благаслаўлення Найсвяцейшым Сакрамантам удзельнікі сабраліся ў катэхетычнай зале на далейшае святкаванне. Пасля дзялення аплаткай і складання адзін аднаму віншаванняў з нагоды блізкіх святаў Раства Хрыстова пачаліся розныя гульні і конкурсы. На заканчэнне на сустрэчу наведаўся св. Мікалай, які ўручыў дзецям і моладзі падарункі.
Падрыхтаваў а. Віталій Слука
Фота: Людміла Казлова, Дзмітрый Дзікевіч
