Раніцай 7 ліпеня з Гродна на ўрачыстасці ў дыяцэзіяльны санктуарый Каралевы нашых сем’яў у Тракелях вырушыла 26-я пешая пілігрымка.
У шлях да Маці Божай адправіліся каля 250 вернікаў.
Перад выхадам пілігрымкі ў парафіі Найсвяцейшага Адкупіцеля адбылася святая Імша, якую ўзначаліў біскуп Гродзенскі Аляксандр Кашкевіч.
Гамілію прамовіў кіраўнік пілігрымкі кс. канонік Антоні Грэмза. Ён назваў пілігрымку асаблівым часам і выйсцем з зоны камфорту і дадаў, што пасля такога выйсця пачынаецца сапраўднае жыццё чалавека.
Па словах ксяндза Антонія, пасля пілігрымкі чалавек змяняецца, калі адкрываецца на ласку. Нагадаў ён і пра тое, як важна мець жывыя адносіны з Богам, пра тое, што для чалавека “Бог не можа быць звычкай, да Яго немагчыма прызвычаіцца”.
Святар адзначыў, што пілігрымка асацыюецца з радасцю, супакоем, надзеяй, з іншага боку – са стомленасцю і мазалямі, а таксама з Найсвяцейшай Паннай Марыяй. “Марыя, наша Каралева, маліся за нас і вядзі да неба”, – з такімі словамі малітвы звярнуўся кіраўнік пілігрымкі да Маці Божай.
Біскуп Кашкевіч у канцы Імшы ўдзяліў благаслаўленне тым, хто вырушыў у гэты шасцідзённы шлях.
Маршрут пілігрымкі, які будзе праходзіць праз лясы і палі, вёскі і гарады, наступны: Гродна – Парэчча – Новы Двор – Забалаць – Радунь – Жырмуны – Тракелі.
У межах урачыстасцяў у дыяцэзіяльным санктуарыі, дэвіз якіх “Марыя – наша Каралева”, будзе святкавацца юбілей 15-годдзя з часу каранавання цудадзейнага тракельскага абраза. 5 ліпеня 2009 года кардынал Казімір Свёнтэк усклаў на абраз папскія кароны.
Прэс-служба Гродзенскай дыяцэзіі
Фота: Ангеліна Целеш
