5 лістапада, у актаву малітваў за памерлых, у парафіі св. Максімільяна Кольбэ і св. Станіслава, біскупа, у Каробчыцах (дэканат Гродна-Захад) прайшоў Баль Усіх Святых.
Ролі біблійных герояў выканалі дзеці. Несумненна, для іх і іх бацькоў падрыхтоўка да гэтай падзеі патрабавала шмат часу і працы, але гэта было не дарэмна.
У капліцы, часовым месцы малітвы парафіяльнай супольнасці, якая будуе свой касцёл, у гэты дзень было сапраўды як у небе. Сярод святых можна было сустрэць Маці Божую, святога Юзафа, апостала Юду Тадэвуша, ролю якога выканаў пробашч парафіі ксёндз Ян Рушніцкі, Яна Паўла ІІ, Цэцылію, Рыту, у ролі якой была катэхетка парафіі сястра Магдаліна Кулай, і многіх іншых.
Як дзяцей, так і дарослых баль натхніў знаёміцца са святымі і наследаваць іх жыццё. Акрамя таго, ён нагадаў вернікам, што кожны пакліканы да святасці.
Прэс-служба Гродзенскай дыяцэзіі
