Дзеці гродзенскай парафіі Найсвяцейшага Адкупіцеля праводзяць Адвэнт разам са св. Яўхімам

З надыходам Адвэнту, які распачынае ў Касцёле новы літургічны год, у парафіях пачаліся раратнія святыя Імшы. На гэтых Імшах, якія цэлебруюцца ў гонар Маці Божай, збіраюцца шматлікія дзеці, моладзь, а таксама дарослыя.

У гродзенскай парафіі Найсвяцейшага Адкупіцеля (Дзевятоўка) раратнія Імшы карыстаюцца вялікай папулярнасцю. На іх збіраюцца сотні дзяцей і маладых людзей, якія ўстаюць рана, каб узяць удзел у літургіі, якая пачынаецца ў 6.45.

Дэвіз сёлетніх Раратаў у парафіі – “Перш чым Езус нарадзіўся, было так…”.

У гэтым годзе на працягу ўсяго Адвэнту ўдзельнікам раратніх Імшаў будзе дапамагаць святы Яўхім, дзед Пана Езуса. Ён будзе расказваць ім, што адбывалася да таго, як Езус нарадзіўся.

Першая раратняя Імша ў дзевятоўскім касцёле прайшла 28 лістапада. У гаміліі пробашч парафіі а. Анджэй Ядкоўскі CSsR патлумачыў сэнс Адвэнту, які заключаецца ў чаканні Езуса.

“Мы чакаем гэтай асаблівай ночы, калі будзе нараджэнне самога Бога, калі Бог сыходзіць на зямлю. А калі нараджэнне, тады збіраецца ўся сям’я, каб святкаваць, радавацца, спяваць калядкі. І да гэтага мы рыхтуемся праз шлях Адвэнту. Мы пачынаем рыхтаваць нашыя сэрцы, нашую душу да прыйсця Збаўцы”, – адзначыў пробашч.

Святар падкрэсліў, што з дапамогай гэтых Раратаў удзельнікі даведаюцца, чаму чалавек быў павінен выйсці з раю, даведаюцца, што Бог не пакінуў чалавека, пачуюць, як Бог паслаў Ноя і той пабудаваў каўчэг, а таксама хто такі быў Абрагам.

Пробашч заахвоціў парафіян з радасцю ісці дарогай Адвэнту разам са святым Яўхімам.

На заканчэнне Імшы хор дзяцей, які налічвае амаль 40 чалавек і ўпрыгожвае спевам гэтыя Рараты, заспяваў іх гімн “Перш чым Езус нарадзіўся, было так”.

Пасля літургіі дзеці атрымалі адмысловыя таблічкі на Адвэнт, каб кожны дзень ставіць у іх новую адзнаку.

Прэс-служба Гродзенскай дыяцэзіі