1 кастрычніка, ва ўспамін св. Тэрэзы ад Дзіцяткі Езуса, панны і доктара Касцёла, на Імшы ў гродзенскім касцёле Адшукання Святога Крыжа (пабернардынскі) чацвёра студэнтaў трэцяга курса Вышэйшай духоўнай семінарыі ў Гродне атрымалі духоўнае адзенне – сутаны.
Гэтай Імшой пачаўся 2022/2023 навучальны год у семінарыі. Літургію ўзначаліў біскуп Гродзенскі Аляксандр Кашкевіч.
У Эўхарыстыі ўдзельнічалі генеральны вікарый Мінска-Магілёўскай архідыяцэзіі біскуп Юрый Касабуцкі, выкладчыкі і выхаваўцы семінарыйнай супольнасці, святары, сёстры законныя, свецкія супрацоўнікі семінарыі, бацькі і блізкія студэнтаў.
На пачатку літургіі біскуп Кашкевіч адзначыў, што святарскае служэнне сёння і ў будучыні “будзе патрабаваць ад святара чалавечых якасцяў, глыбокай і жывой веры, адпаведнага ўзроўню і ўмення эфектыўнага апостальства”.
Таму ўжо ў семінарыі, падкрэсліў іерарх, неабходна праз усебаковую фармацыю атрымаць глыбокае разуменне Божых спраў, каб дзейнічаць “in persona Christi” на хвалу Бога і для збаўлення людзей.
Імшу пастыр Касцёла на Гродзеншчыне цэлебраваў у інтэнцыі ўсіх, хто ўтварае семінарыйную сям’ю, а асабліва ў інтэнцыі тых семінарыстаў, якія першы раз апранулі духоўнае адзенне.
У гаміліі біскуп Юрый Касабуцкі адзначыў, што святар павінен нястомна імкнуцца быць чулым, адкрытым, а таксама заўсёды несці людзям радасць.
Па словах іерарха, мадэратары і духоўны айцец семінарыі з’яўляюцца “скульптарамі” будучых святароў, на іх ляжыць важная задача выхавання гэтых святароў, таму ім заўсёды патрэбна святло Духа Святога.
Звяртаючыся да семінарыстаў, дапаможны біскуп архідыяцэзіі папрасіў іх, між іншым, палюбіць адарацыю Найсвяцейшага Сакрамэнту і з яе чэрпаць сілы, патрэбныя ў вучобе і імкненні да Хрыстовага святарства.
Падчас Імшы біскуп Кашкевіч благаславіў сутаны трэцякурснікаў, якія затым апранулі іх у сакрыстыі. Ускладанне сутан з’яўляецца чарговым крокам у семінарыйнай фармацыі і знакам прыналежнасці да Касцёла.
На заканчэнне Эўхарыстыі семінарысты, якія атрымалі духоўнае адзенне, падзякавалі Богу за пастаяннае суправаджэнне і ўсе ласкі, а ўсім, хто паспрыяў іх фармацыі і падрыхтоўцы да гэтай падзеі, паабяцалі сваю ўдзячнасць, якая будзе выражацца ў штодзённай малітве.
Прэс-служба Гродзенскай дыяцэзіі
Фота: Павел Догель