Два новыя прэзбітэры і адзін дыякан: у Гродне адбылося пасвячэнне

3 верасня біскуп Гродзенскі Аляксандр Кашкевіч удзяліў прэзбітэрскае пасвячэнне двум дыяканам і дыяканскае пасвячэнне аднаму студэнту Вышэйшай духоўнай семінарыі ў Гродне. Урачыстасць адбылася ў гродзенскай катэдры св. Францішка Ксаверыя.

Прэзбітэрамi Касцёла на Гродзеншчыне сталі дыяканы Уладзіслаў Малышка i Павел Шэмет, дыяканскае пасвячэнне прыняў Андрэй Юхнік.

Урачыстая Імша сабрала шматлікіх святароў, асобаў кансэкраванага жыцця і вернікаў, якія прыбылі з розных бакоў дыяцэзіі, каб падтрымаць малітвамі кандыдатаў да пасвячэння. Прысутнічалі таксама іх бацькі і прадстаўнікі парафіяльных супольнасцяў, з якіх яны паходзяць i ў якіх праходзілі літургічна-душпастырскую практыку.

Кандыдатаў прадставіў рэктар гродзенскай семінарыі кс. канонік Віталій Вайцяхоўскі.

У гаміліі біскуп назваў вельмі яскравым знакам тое, што гэтая ўрачыстасць пасвячэння адбываецца ў першую суботу месяца, дзень, прысвечаны Маці Божай.

Іерарх падкрэсліў, што ніхто з людзей не з’яднаны настолькі з Хрыстом, ніхто не прабывае так у пастаяннай адарацыі, ніхто не злучаны настолькі ўсёй сваёй істотай з Сынам Божым, як Марыя.

“Гэтае з’яднанне Марыі з Хрыстом, гэтае малітоўнае і адарацыйнае нястомнае прабыванне ў Яго прысутнасці не аддаляе Найсвяцейшую Маці ад нас, людзей, не робіць Яе адчужанай ад свету і абыякавай да пакутаў чалавецтва”, – дадаў біскуп.

Звяртаючыся да кандыдатаў, іерарх адзначыў, што сакрамэнт пасвячэння – вялікі Божы дар, які павінен зрабіць іх слугамі Хрыста, Касцёла і тых людзей, да якіх яны будуць пасланы.

Пастыр Касцёла на Гродзеншчыне звярнуў увагу, што і святарства, і дыяканат павінны быць служэннем: верным, трывалым, пакорным і бескарыслівым. Для таго, каб адпавядаць гэтай вялікай задачы, па словах біскупа, трэба быць людзьмі малітвы і адарацыі.

“Без адарацыі Хрыста, без глыбокай асабістай малітвы, без услухоўвання ў Божае слова ваша прэзбітэрскае ці дыяканскае служэнне будзе пустым і бясплодным, яно не прынясе людзям, да якіх вы будзеце пасланы, столькі ласкаў, колькі павінна”, – сказаў іерарх.

Біскуп нагадаў таксама пра важнасць у жыцці святара асабістай малітвы, адарацыі Хрыста, прысутнага ў Найсвяцейшым Сакрамэнце.

На заканчэнне Эўхарыстыі іерарх выказаў словы ўдзячнасці бацькам, сваякам i ўсім блізкім новых прэзбітэраў і дыякана за перададзены ім дар веры і добры прыклад хрысціянскага жыцця.

Ксёндз Уладзіслаў Малышка ад імя тых, хто прыняў пасвячэнне, выказаў словы ўдзячнасці ўсім, хто падтрымліваў іх на шляху да Хрыстовага алтара, і папрасіў аб далейшым малітоўным спадарожнічанні.

Ксёндз Уладзіслаў Малышка нарадзіўся 1 жніўня 1998 г. у Гродне, паходзіць з парафіі св. Вацлава ў Ваўкавыску. У апошні час праходзіў літургічна-душпастырскую практыку ў лідскай парафіі Узвышэння Святога Крыжа (Фара).

Ксёндз Павел Шэмет нарадзіўся 12 ліпеня 1997 г., паходзіць з парафіі Унебаўзяцця Найсвяцейшай Панны Марыі ў Капцёўцы (дэканат Гродна-Захад). У апошні час праходзіў літургічна-душпастырскую практыку ў парафіі Спаслання Святога Духа ў Бярозаўцы (Навагрудскі дэканат).

Дыякан Андрэй Юхнік нарадзіўся 13 верасня 1998 г. у Лідзе, паходзіць з лідскай парафіі Святой Сям’і. На шосты і апошні год семінарыйнай вучобы і фармацыі накіраваны ў Вышэйшую духоўную семінарыю ў Элку (Польшча).

Жадаем новапрэзбітэрам Уладзіславу і Паўлу заўсёды ўслухоўвацца ў голас Добрага Пастыра, каб сеяць Божае слова ў нашым Касцёле на Гродзеншчыне.

Дыякану Андрэю, дзякуючы за шматгадовае супрацоўніцтва з Аддзелам сродкаў масавай інфармацыі Гродзенскай дыяцэзіі, жадаем Божых дароў на апошнім этапе яго падрыхтоўкі да прэзбітэрскага пасвячэння. Няхай Маці Божай Міласэрнасці заўсёды захоўвае яго ў сваёй апецы!

Прэс-служба Гродзенскай дыяцэзіі

Фота: Аляксей Ціхан