23 чэрвеня ў парафіі св. Яна Хрысціцеля ў Гальшанах (Ашмянскі дэканат) адзначылі адпустовую ўрачыстасць тытулу касцёла.
Абраз Яна Хрысціцеля знаходзіцца ў галоўным алтары гістарычнай святыні. У гэты дзень у касцёле сабраліся мясцовыя парафіяне і вернікі з навакольных парафій, прыбылі запрошаныя святары.
Урачыстую Імшу ўзначаліў дэкан Ашмянскага дэканату ксёндз канонік Ян Пузына. Прывітаў усіх прысутных пробашч парафіі айцец Багуслаў Вуйтовіч OFM Conv.
У гаміліі правінцыяльны дэлегат айцоў францішканаў у Беларусі айцец Павел Раманчук OFM Conv з Івянца звярнуў увагу прысутных на постаць святога Яна Хрысціцеля, яго нараджэнне ў сям’і Захарыі і Альжбеты, місію, з якой ён прыйшоў на зямлю.
Францішканін звярнуўся да ўсіх з пытаннем, каму ў сваім жыцці яны паказалі праўдзівага Езуса Хрыста. Святар дадаў, што Ян Хрысціцель нёс людзям праўду пра Божага Сына і прасіў аб пакаянні і навяртанні і што кожны чалавек сваім жыццём павінен спаўняць Божую волю: не толькі тады, калі лёгка ісці па жыцці, але асабліва тады, калі ёсць цяжкасці, цярпенні, хваробы, няўдачы, кожнай хвілінай свайго жыцця паказваць людзям Бога.
Прыгожым спевам і ігрой на аргане літургію аздобіў магістр музыкалогіі арганіст Андрэй Міхневіч.
У канцы Імшы айцец Багуслаў Вуйтовіч павіншаваў з імянінамі тых з прысутных, хто носіць імёны Ян і Яніна, а таксама тых святароў, якія адзначаюць імяніны ў гэты дзень, і падзякаваў за ўдзел ва ўрачыстасці.
Пасля Літаніі да святога Яна Хрысціцеля перад выстаўленым Найсвяцейшым Сакрамэнтам духавенства і вернікі прайшлі ў эўхарыстычнай працэсіі вакол касцёла і кляштара, давяраючы заступніку парафіі ўсе свае клопаты і праблемы. У касцёле ўрачыста прагучаў гімн “Цябе, Бога, праслаўляем”. На завяршэнне актавы Божага Цела адбылося благаслаўленне прынесеных вернікамі кветак і зёлак.
Цудоўным падарункам для прысутных быў невялікі канцэрт арганнай музыкі ад саліста Беларускай дзяржаўнай філармоніі Аляксандра Музыкантава і магістра музыкалогіі арганіста Андрэя Міхневіча.
Людміла Пясецкая