У Макараўцах маліліся за а. Францішка Кракоўскага ў 25-ю гадавіну яго смерці

28 Сакавіка 2022

26 сакавіка ў касцёле Узвышэння Святога Крыжа ў Макараўцах (Бераставіцкі дэканат) адбылася святая Імша ў інтэнцыі айца рэдэмптарыста Францішка Кракоўскага ў 25-ю гадавіну яго смерці.

З 1993 па 1997 год ён быў пробашчам гэтай парафіяльнай супольнасці, якая стала апошнім месцам яго душпастырскага служэння. Святар быў пахаваны каля касцёла ў Макараўцах.

Парафіяне сабраліся ў старадаўняй святыні на Імшы, каб дзякаваць Богу за дар гэтага святара. Як падкрэсліў, вітаючы прысутных, пробашч ксёндз Павел Беланос, айцец Францішак служыў макараўскім вернікам з вялікай адданасцю.

Прыбыло таксама духавенства, у тым ліку рэдэмптарысты – сабраты айца Кракоўскага.

makarowce 7

Перад Імшой, якую цэлебраваў біскуп Гродзенскі Аляксандр Кашкевіч, прысутным прыгадаў жыццёвы шлях айца Францішка пробашч парафіі Перамянення Пана ў Вялікай Бераставіцы а. Вальдэмар Слота CSsR.

На заканчэнне Эўхарыстыі а. Вальдэмар прачытаў слова, якое даслаў з гэтай нагоды правінцыял Кангрэгацыі Найсвяцейшага Адкупіцеля а. Януш Сок CSsR. Настаяцель Варшаўскай правінцыі рэдэмптарыстаў узгадаў а. Францішка як моцнага ў веры і трывалага ў дзеянні чалавека, які выконваў усе абавязкі манаскага жыцця ў дамах кангрэгацыі ў Польшчы, а ў 57 гадоў пачаў служэнне сярод народу, які прагнуў Бога, за ўсходняй мяжой сваёй радзімы.

makarowce 1

“Ён застаўся ў нашай памяці як добры пастыр. Ён клапаціўся не толькі пра даручаную яму парафію ў Макараўцах, якую ў 1995 годзе ўвёў у трэцяе стагоддзе існавання, але дбаў і аб тым, каб як мага больш згубленых авечак, часта параненых наступствамі шматгадовай атэізацыі, прывесці да Бога”, – напісаў правінцыял рэдэмптарыстаў.

Айцец Францішак Кракоўскі нарадзіўся 13 снежня 1935 г. у вёсцы Гвоздзец у Польшчы. У яго былі тры сястры і брат. З рэдэмптарыстамі ўпершыню сустрэўся ў Тухуве і з таго часу хацеў служыць Пану Богу ў гэтай місіянерскай супольнасці, пры санктуарыі Маці Божай Тухуўскай.

Прэзбітэрскае пасвячэнне яму ўдзяліў біскуп Уладзімір Ясінскі 26 жніўня 1960 г. Затым айцец Кракоўскі служыў у Польшчы ў Глогуве, Шчэціне, Гдыні, Замосці.

Калі з’явілася магчымасць ажыццяўляць святыя місіі на Усходзе, а. Францішак звярнуўся з просьбай да правінцыяла, каб вырушыць туды.

У 1993 г. прыбыў у парафію ў Макараўцах, дзе служыў да сваёй смерці – 26 сакавіка 1997 г.

Быў пахаваны на мясцовых могілках каля касцёла, атулены сардэчнай малітвай і памяццю сваіх парафіян. На яго магіле часта запалены знічы, прынесены кветкі. Вернікі памятаюць пра свайго добрага пастыра, які вёў іх да Бога.