20 сакавіка ў араторыі св. Яна Боско пры парафіі св. Міхала Арханёла ў Смаргоні адбылося свята ў гонар святога Юзафа для татаў і хлопчыкаў. Урачыстасць св. Юзафа адзначалася ў Касцёле напярэдадні.
Для татаў, хлопчыкаў і ўсіх прысутных была падрыхтавана праграма, якая ўключала розныя гульні і забавы. Было цікава бачыць, як дзеці гуляюць разам з бацькамі. Асабліва зацікавіла піньята, якой дзеці вельмі чакалі.
У слове на заканчэнне свята было падкрэслена, што кожны з нас вельмі важны ў сваёй сям’і, мае сваё заданне, а таксама вельмі важны для Бога. Нагадвалася пра неабходнасць заўважаць прыгажосць адзін аднаго, якая, па-свойму адметная, ёсць у кожным чалавеку. Прагучалі пажаданні, каб таты і хлопчыкі вучыліся ад святога Юзафа адвазе і мужнасці, каб іх сэрцы былі адкрытыя на патрэбы іншых.
Потым прысутных чакалі агульны фотаздымак і салодкі сюрпрыз.
Пасля свята дзеці разам з бацькамі ўдзельнічалі ў святой Імшы. На ёй кс. Казімір Мурава SDB заахвоціў, каб кожны зазірнуў у сваё сэрца і вызначыў, ці сапраўды там падчас Вялікага посту адбываюцца перамены ў адносінах да Бога і бліжняга.
C. Валянціна Кот FMA
